ٹانک کے قبائلی علاقے جنڈولہ اور جنوبی وزیرستان کی تحصیل برمل میں سیکیورٹی خدشات کے پیش نظر کرفیو نافذ کر دیا گیا ہے۔
یہ بھی پڑھیں:شمالی وزیرستان میں کرفیو کا اعلان
کرفیو کا دوارنیہ صبح 6 بجے سے شام 7 بجے تک ہوگا، اس دوران ہر قسم کی نقل و حرکت، بازاروں اور تجارتی سرگرمیوں پر مکمل پابندی عائد ہو گی۔
میڈیا رپورٹس کے مطابق ڈپٹی کمشنر وانا کا کہنا ہے کہ برمل میں بھی یہی پابندیاں لاگو ہوں گی۔ کرفیو کے دوران تمام راستے اور مرکزی شاہراہیں بند رہیں گی تاکہ ممکنہ خطرات سے نمٹا جا سکے۔
اس سے قبل ڈپٹی کمشنر ٹانک نے بتایا کہ جنڈولہ میں تمام بازار، مارکیٹیں اور داخلی و خارجی راستے بند کر دیے جائیں گے۔ جنڈولہ بازار اور وہاں سے جنوبی وزیرستان اپر جانے والے تمام راستے بھی کرفیو کے دوران بند رہیں گے۔
انتظامیہ کے مطابق اس اقدام کا مقصد علاقے میں امن و امان برقرار رکھنا اور کسی بھی ممکنہ ناخوشگوار واقعے سے بچاؤ ہے۔
