لاہور ہائیکورٹ نے چیئرمین تحریک انصاف عمران خان کو پارٹی عہدے سے ہٹانے کی درخواست پر فیصلہ محفوظ کر لیا۔
لاہور ہائیکورٹ کے جسٹس عابد حسین چٹھہ نے محمد آفاق ایڈووکیٹ کے توسط سے دائر درخواست کی سماعت کی، درخواست گزار نے عدالت سے استدعا کی کہ عدالت کیس دوسرے بینچ کو منتقل کردے۔
محمد آفاق ایڈووکیٹ کے توسط سے دائر درخواست میں مؤقف اختیار کیا گیا ہے کہ توشہ خانہ کے حقائق چھپانے پر الیکشن کمیشن نے عمران خان کو نااہل قرار دیا۔ اس کی نظیر موجود ہے کہ نااہلی کے بعد سابق وزیراعظم نوازشریف بھی پارٹی صدر نہیں رہے تھے، قانونی طور پر نااہلی کے بعد کوئی پارٹی سربراہ نہیں رہ سکتا۔
درخواست گزار نے عدالت سے استدعا کی ہے کہ الیکشن کمیشن سے بھی رجوع کیا مگر عمران خان کو عہدے سے ہٹانے کی درخواست پر کوئی کارروائی نہیں کی گئی۔ عدالت عمران خان کو چیئرمین تحریک انصاف کے عہدے سے ہٹانے کا حکم دے۔
عدالت نے درخواست کے قابل سماعت ہونے یا نہ ہونے پر فیصلہ محفوظ کرلیا۔
