پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے اپنی گرفتاری کی بعد کی صورتحال کے بارے میں خدشے کا اظہار کرتے ہوئے عوام سے کہا ہے کہ ’شاید آج کے بعد مجھے آپ سے مخاطب ہونے کا موقع نہ ملے‘۔
منگل کو عمران خان کی گرفتاری کے بعد پی ٹی آئی کے آفیشل ٹوئٹر اکاؤنٹ سے جاری کیے گئے ایک ویڈیو بیان میں پارٹی سربراہ نے کہا کہ جب تک ان کے یہ الفاظ عوام تک پہنچے گیں اس وقت تک انہیں ایک ناجائز کیس میں بند کردیا گیا ہوگا۔ انہوں نے مزید کہا کہ ’ہو سکتا ہے کہ انہیں آئندہ عوام سے مخاطب ہونے کا موقع نہ ملے اس لیے وہ کچھ باتیں کہنا چاہنے ہیں۔ ان کا کہنا تھا کہ ’پاکستان کی قوم مجھے50 سال سے جانتی ہے، میں کبھی آئین کے خلاف گیا اور نہ ہی کبھی کوئی قانون توڑا۔
انہوں نے اپنی ’ناجائز‘ گرفتاری پر تبصرہ کرتے ہوئے کہا کہ ’آج ملک میں ائین اور قانون دفن ہوگیا۔
چیئرمین تحریکِ انصاف عمران خان کا ریکارڈ شدہ ویڈیو بیان سامنے آگیا۔ pic.twitter.com/1L1p4oNJod
— Tehreek-e-Insaf (@InsafPK) May 9, 2023
عمران خان کا کہنا تھا کہ ارباب اختیار انہیں جو آج گرفتار کیا جا رہا ہے وہ اس لیے نہیں کہ انہوں نے کوئی قانون توڑا ہے بلکہ یہ اس لیے ہے کہ وہ ملک کو ایک حقیقی آزادی دلوانے کی کوشش کر رہے ہیں۔ ا ن کا مزید کہنا تھا کہ ارباب اختیار چاہتے ہیں کہ وہ ملک پر قابض کرپٹ ٹولے کو قبول کرلوں۔
پی ٹی آئی سربراہ نے عوام پر زور دیتے ہوئے کہا کہ ’حقیقی آزادی کے لیے آپ سب کو نکلنا پڑے گا کیوں کہ کسی بھی قوم کو پلیٹ میں رکھ کر ازادی نہیں دی جاتی بلکہ اس کے لیے جدوجہد اور محنت کرنی پڑتی ہے جس کے بعد ہی اللہ انہیں آزادی کا تحفہ دیتا ہے لہٰذا اب وقت آگیا ہے کہ آپ سب اپنے حقوق کے لیے نکلیں‘۔
انہوں نے کہا کہ جب سے انہوں نے اپنی سیاست کا آغاز کیا ہے وہ کبھی آئین و قانون کے خلاف نہیں گئے اور جو بھی احتجاج کیا وہ پرامن رہ کر کیا۔
