چیئرمین پاکستان تحریک انصاف عمران خان کی گرفتاری کے بعد پیدا شدہ صورت حال کے باعث آل پاکستان پرائیویٹ اسکولز فیڈریشن نے بدھ کے روز ملک بھر میں اسکولز بند رکھنے کا اعلان کیا ہے۔
سیکرٹری اطلاعات آل پاکستان پرائیویٹ اسکولز فیڈریشن کاشف مرزا نے کہا کہ ہنگامی صورت حال کے پیش نظر 10 مئی کو ملک بھر میں پرائیویٹ اسکولز بند رہیں گے۔
انہوں نے بتایا کہ پرائیویٹ اسکولزریگولرکلاسز شیڈول کا آئندہ اعلان بدھ کے روز مشاورت کے بعد جاری کیا جائےگا۔
کاشف مرزا نے کہا کہ طلبا، اساتذہ، سٹاف اوروالدین سے اپیل ہے کہ ہنگامی صورتحال کے پیش نظر پرامن رہیں اور احتیاط کریں۔
واضح رہے کہ چیئرمین تحریک انصاف عمران خان کی نیب کیس میں گرفتاری کے بعد پی ٹی آئی کے کارکنان نے ملک بھر میں احتجاج کی کال دے دی ہے جس کے بعد جگہ جگہ ٹریفک معطل ہو چکی ہے اور لوگوں کو مشکلات کا سامنا کرنا پڑ رہا ہے۔
پرائیویٹ اسکولز بدھ کے روز کھلے رہیں گے: کاشف ادیب جاودانی
دوسری جانب پرائیویٹ اسکولز ایسوسی ایشن کے ایک اور گروپ کے ذمہ دار کاشف ادیب جاودانی نے کہا ہے کہ عوام افواہوں پر کان نہ دھریں۔ بدھ کے روز ملک بھر میں پرائیویٹ اسکولز کھلے رہیں گے۔
کاشف ادیب جاودانی کا کہنا تھا کہ تعلیمی سرگرمیاں بلا تعطل جاری رہیں گی۔
