نگران وزیر اعلیٰ خیبر پختونخوا محمد اعظم خان نے کہا ہے کہ پر تشدد مظاہرے کسی کے بھی مفاد میں نہیں، احتجاج کی آڑ میں نجی و سرکاری املاک کو نقصان پہنچانے کی کسی صورت اجازت نہیں دیں گے۔
صوبائی کابینہ کے اجلاس سے خطاب کرتے ہوئے نگران وزیر اعلیٰ کا کہنا تھا کہ احتجاج اور آزادی اظہار رائے سب کا جمہوری، سیاسی اور آئینی حق ہے، احتجاج پرامن اور جمہوری انداز میں ہونا چاہیے۔ اس وقت ملک بھر کی طرح صوبے کے بعض مقامات پربھی پرتشدد مظاہروں کا سلسلہ جاری ہے، ان پر تشدد مظاہروں میں نجی اور سرکاری املاک کو نقصان پہنچایا گیا ہے۔
انہوں نے مزید کہا کہ سرکاری املاک عوام کے ٹیکس سے بنی ہیں، یہ ملک کا اثاثہ ہیں، صوبائی حکومت عوام کی جان و مال اور سرکاری املاک کے تحفظ کو ہر لحاظ سے یقینی بنائے گی۔ امن و امان کا قیام اور عوام کے جان و مال کا تحفظ حکومت کی اولین ذمہ داری ہے، اس ذمہ داری سے کسی صورت غافل نہیں ہوں گے۔
انہوں نے کابینہ کو یقین دہانی کرائی کہ شہریوں کے معمولات زندگی کو متاثر نہیں ہونے دیا جائے گا۔ مظاہرین احتجاج کا اپنا جمہوری حق ضرور استعمال کریں لیکن امنِ عامہ میں خلل ڈالنے اور املاک کو نقصان پہنچانے سے گریز کریں۔
اعظم خان نے عوام الناس خصوصا مظاہرین سے اپیل کی کہ وہ قانون کو اپنے ہاتھ میں لینے کی کوشش نہ کریں، اگر ایسا کیا گیا تو پھر قانون کو بھی حرکت میں آنا پڑے گا۔
انہوں نے موجودہ صورت حال میں پولیس اور انتظامیہ کے کردار کو قابل ستائش قرار دیتے ہوئے امن و امان برقرار رکھنے والے اداروں کو ہدایت کی کہ وہ سرکاری املاک اور حساس تنصیبات کی سیکیورٹی پر خصوصی توجہ دیں۔ حکومت امن و امان کو برقرار رکھنے کے لیے پولیس کو درکار تمام وسائل فراہم کرے گی۔
