پاکستان کا 79واں یومِ آزادی ملک بھر میں ملی جوش و جذبے کے ساتھ منایا جا رہا ہے۔ رات 12 بجتے ہی جشن کا آغاز ہوا، بھارت کے خلاف تاریخی فتح اور آزادی کی خوشی میں ہر شہر، ہر گلی اور محلہ سبز ہلالی پرچم کے رنگوں میں رنگ گیا۔ کراچی، لاہور، اسلام آباد، پشاور، کوئٹہ اور ملتان سمیت ملک کے کونے کونے میں چراغاں اور آتش بازی کا اہتمام ہوا جبکہ شہری ریلیوں کی صورت میں سڑکوں پر نکل آئے۔
یہ بھی پڑھیں:جشن آزادی پاکستان: وزیراعظم نے یادگار معرکہ حق ماڈل کی نقاب کشائی کردی
بدھ کو اسلام آباد کے جناح اسپورٹس کمپلیکس میں یومِ آزادی اور معرکہ حق کی فتح کی مرکزی تقریب منعقد ہوئی جس میں صدر مملکت آصف علی زرداری، وزیرِاعظم شہباز شریف اور تینوں مسلح افواج کے سربراہان شریک ہوئے۔ تقریب میں وفاقی وزراء، اراکینِ پارلیمنٹ، دوست ممالک کے سفیروں اور شہریوں کی بڑی تعداد بھی موجود تھی۔ پاک آرمی، پاک بحریہ اور پاک فضائیہ کے چاق چوبند دستوں کے ساتھ پنجاب رینجرز اور ایف سی خیبرپختونخوا نے مارچ پاسٹ کیا، جبکہ تینوں مسلح افواج کے بینڈز نے ملی نغمے پیش کیے۔ اس موقع پر وزیراعظم نے یادگارِ معرکہ حق کے ماڈل کی نقاب کشائی بھی کی۔
دن کے آغاز پر اسلام آباد، لاہور اور کوئٹہ میں 21 توپوں کی سلامی دی گئی اور نمازِ فجر میں ملکی ترقی، یکجہتی، امن اور خوشحالی کے لیے خصوصی دعائیں کی گئیں۔ جشن آزادی کے موقع پر مزارِ قائد کراچی اور مزارِ اقبال لاہور میں گارڈز کی تبدیلی کی پروقار تقریبات بھی ہوئیں۔
یہ بھی پڑھیں:عمران خان کی کال پر 14 اگست کو احتجاج ہو گا یا نہیں؟ پی ٹی آئی تذبذب کا شکار
صدر مملکت نے قوم کو آزادی کی سالگرہ کی مبارکباد دیتے ہوئے کہا کہ یہ دن جرات، اتحاد اور قربانیوں کی یاد دلاتا ہے۔
انہوں نے کہا کہ معرکہ حق میں کامیابی غیر متزلزل عزم اور قومی اتحاد کا ثبوت ہے، بھارت کی بلاجواز جارحیت کے جواب میں پاکستان نے تحمل اور بھرپور قوت سے دفاع کیا، اور دنیا آج پاکستان کو امن کا خواہاں مگر دباؤ کے آگے نہ جھکنے والا ملک سمجھتی ہے۔
آئی ایس پی آر کے مطابق آرمی چیف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے قوم کو یومِ آزادی کی مبارکباد دیتے ہوئے کہا کہ یہ دن وحدت، ثابت قدمی اور روشن مستقبل کے عزم کی علامت ہے۔ مسلح افواج نے اس موقع پر اُن رہنماؤں اور سپاہیوں کو بھی سلام پیش کیا جنہوں نے وطن کی بنیادیں رکھیں۔
