خیبر پختونخوا میں بارشوں اور فلش فلڈ کتنی ہلاکتیں اور کیا تباہی ہوئی؟ پی ایم ڈی اے نے ابتدائی رپورٹ جاری کر دی

صوبائی ڈیزاسٹر مینجمنٹ اتھارٹی (پی ڈی ایم اے) کے مطابق گزشتہ 24 گھنٹوں کے دوران خیبر پختونخوا کے مختلف اضلاع میں شدید بارشوں اور فلش فلڈ کے باعث پیش آنے والے حادثات میں 60 افراد جاں بحق اور 16 زخمی ہوئے۔

یہ بھی پڑھیں:آزادکشمیر، گلگت بلتستان اور خیبر پختونخوا میں طوفانی بارشوں اور کلاؤڈ برسٹ سے 70 ہلاکتیں، متعدد لاپتا

پی ڈی ایم اے کی ابتدائی رپورٹ کے مطابق جاں بحق ہونے والوں میں 40 مرد، 8 خواتین اور 12 بچے شامل ہیں، جبکہ زخمیوں میں 13 مرد، 2 خواتین اور ایک بچہ شامل ہے۔ بارشوں اور سیلابی ریلوں سے 35 مکانات کو نقصان پہنچا، جن میں 28 جزوی طور پر اور 7 مکمل طور پر تباہ ہوئے۔

متاثرہ اضلاع اور ریسکیو آپریشن

یہ حادثات سوات، بونیر، باجوڑ، تورغر، دیر اپر و لوئر، مانسہرہ، شانگلہ اور بٹگرام میں پیش آئے، جن میں باجوڑ اور بٹگرام سب سے زیادہ متاثر ہیں۔ ریسکیو آپریشن ان اضلاع میں تاحال جاری ہے۔ صوبائی حکومت نے باجوڑ اور بونیر میں ریسکیو سرگرمیوں کے لیے دو ہیلی کاپٹر بھی روانہ کیے ہیں۔

موسمی صورتحال اور انتباہات

محکمہ موسمیات کے مطابق شدید بارشوں کا سلسلہ 21 اگست تک وقفے وقفے سے جاری رہنے کا امکان ہے۔ پی ڈی ایم اے نے قبل از وقت تمام ضلعی انتظامیہ کو پیشگی اقدامات کے لیے مراسلہ جاری کیا تھا۔

امدادی سرگرمیاں اور ہدایات

پی ڈی ایم اے نے تمام متاثرہ اضلاع میں امدادی کارروائیاں تیز کرنے اور متاثرین کو فوری ریلیف فراہم کرنے کی ہدایت کی ہے۔ اس کے علاوہ سیاحتی مقامات پر بند شاہراہوں اور رابطہ سڑکوں کی بحالی کے لیے تمام وسائل بروئے کار لانے کا حکم دیا گیا ہے۔

عوام کو مشورہ دیا گیا ہے کہ وہ موسمی صورتحال سے باخبر رہیں اور احتیاطی تدابیر اختیار کریں۔ پی ڈی ایم اے کا ایمرجنسی آپریشن سینٹر مکمل فعال ہے، جبکہ کسی بھی ناخوشگوار واقعے یا معلومات کے لیے فری ہیلپ لائن 1700 پر رابطہ کیا جا سکتا ہے۔