مسلم لیگ (ن) کے قائد اور سابق وزیراعظم نواز شریف نے پمز اسپتال میں آتشزدگی کے نتیجے میں 14 معصوم بچوں کے جاں بحق ہونے پر گہرے دکھ اور افسوس کا اظہار کیا ہے۔
سوشل میڈیا پلیٹ فارم ایکس پر اپنے بیان میں نواز شریف نے کہا کہ پمز اسپتال میں آتشزدگی کے سانحے میں 14 معصوم بچوں کی جانیں جانے کی خبر نے ان کا دل انتہائی غمگین کردیا ہے۔
پمز ہسپتال میں آتشزدگی کے سانحے میں 14 معصوم بچوں کے جاں بحق ہونے کی خبر سن کر دل رنجیدہ ہے۔ میں غمزدہ والدین کے غم میں برابر کا شریک ہوں۔ اللہ تعالیٰ لواحقین کو صبر جمیل عطا فرمائے۔ حکومت کو ذمہ داروں کا تعین کر کے سخت کارروائی کرنی چاہئے اور آئندہ ایسے واقعات کی روک تھام کو…
— Nawaz Sharif (@NawazSharifMNS) August 26, 2026
نواز شریف نے جاں بحق بچوں کے والدین اور سوگوار خاندانوں سے اظہارِ تعزیت کرتے ہوئے کہا کہ وہ متاثرہ والدین کے دکھ میں برابر کے شریک ہیں۔
سابق وزیراعظم نے دعا کی کہ اللہ تعالیٰ متاثرہ خاندانوں کو صبر اور حوصلہ عطا فرمائے۔
یہ بھی پڑھیں: پمز اسپتال سانحہ، وزیراعظم کا شدید برہمی کا اظہار، وفاقی سیکریٹری صحت معطل
نواز شریف نے حکومت پر زور دیا کہ سانحے کے ذمہ دار افراد کا تعین کیا جائے اور ان کے خلاف سخت کارروائی عمل میں لائی جائے۔
انہوں نے کہا کہ مستقبل میں ایسے افسوسناک واقعات کی روک تھام کے لیے مؤثر اقدامات اور ضروری حفاظتی انتظامات یقینی بنائے جانے چاہئیں۔
