مشہور سوشل میڈیا انفلوئنسر رجب بٹ نے ڈکی بھائی کی گرفتاری پر ردعمل دیتے ہوئے کہا ہے کہ یہ ایک مشکل وقت ہے اور میں اس صورتحال کو سمجھ سکتا ہوں کیونکہ میں خود بھی ایسے حالات سے گزر چکا ہوں۔
یہ بھی پڑھیں:’ڈکی بھائی‘ کی مشکلات کم نہ ہوسکیں، عدالت نے مزید 5 روزہ ریمانڈ منظور کرلیا
اپنے بیان میں رجب بٹ کا کہنا تھا کہ جب کوئی شخص اندر ہوتا ہے تو شاید وہ اتنا پریشان نہ ہو، لیکن اس کی فیملی بہت ٹینشن میں ہوتی ہے۔
انہوں نے کہا کہ ڈکی بھائی کو پچھلی پیشی پر باہر آ جانا چاہیے تھا، مگر نہیں جانتا کہ ان کے وکیل نے کیس کس طرح پیش کیا۔ ان کے مطابق، ایک ریمانڈ کے بعد دوسرا ریمانڈ نہیں بنتا تھا۔
انہوں نے کہا کہ ڈکی بھائی سمیت ہزاروں انفلوئنسرز نے اس متنازع ایپ کی پروموشن کی ہے جو بظاہر ایک ٹریڈنگ ایپ ہے اور پاکستان میں قانونی طور پر رجسٹرڈ ہے۔
ان کا کہنا تھا کہ اگر یہ دراصل جوا ہے تو اس کے خلاف شروع سے کارروائی ہونی چاہیے تھی۔
یہ بھی پڑھیں:جوئے کی تشہیر کا معاملہ، ڈکی بھائی کے بعد رجب بٹ سمیت کئی بڑے یوٹیوبرز کے خلاف کارروائی شروع
رجب بٹ نے مثال دیتے ہوئے کہا کہ پی ایس ایل میں کھلاڑیوں کی شرٹس پر جن ایپس کا نام آتا ہے وہ ٹریڈنگ نہیں بلکہ جوا ہیں، پھر ان پر کارروائی کیوں نہیں ہوتی۔
انہوں نے کہا کہ قانون سب کے لیے برابر ہونا چاہیے، صرف ڈکی بھائی یا چند افراد کو نشانہ بنانے کے بجائے سب کے خلاف ایکشن ہونا چاہیے۔
انہوں نے مزید کہا کہ اگر ڈکی بھائی اندر ہیں تو اپنی غلطی کی وجہ سے ہیں، لیکن پھر باقی پلیئرز، ٹی وی چینلز اور دیگر انفلوئنسرز کو بھی پکڑا جانا چاہیے تاکہ یہ نظر آئے کہ ایف آئی اے نے سب پر یکساں کارروائی کی ہے۔
اپنے بیان کے آخر میں رجب بٹ نے دعا کی کہ اللہ ڈکی بھائی کی مشکلات آسان کرے اور وہ اپنے گھر خیریت سے واپس آئیں۔
