کوئٹہ۔پشاور ٹرین آپریشن معطل، مسافر پریشان، ریلوے کو لاکھوں کا نقصان

ملک میں حالیہ بارشوں اور سیلابی صورتحال کے باعث پاکستان ریلویز نے کوئٹہ اور پشاور کے درمیان ٹرین آپریشن احتیاطی طور پر 2 دن کے لیے معطل کر دیا ہے، جس کے نتیجے میں مسافر شدید مشکلات اور پریشانی میں مبتلا ہو گئے ہیں۔

جعفر ایکسپریس اور بولان میل بند

ریلوے حکام کے مطابق جعفر ایکسپریس 25 اور 26 اگست کو کوئٹہ سے پشاور نہیں جائے گی۔ پشاور سے کوئٹہ آنے والی سروس بھی مکمل طور پر منسوخ کر دی گئی ہے۔ بولان میل (کوئٹہ تا کراچی) سروس بھی بند رہے گی۔ تاہم، چمن مسافر ٹرین اپنے مقررہ وقت کے مطابق روانہ ہوئی۔

مالی نقصان میں اضافہ

ریلوے انتظامیہ کے مطابق ٹرین آپریشن کی بندش سے:

روزانہ صرف ٹکٹوں کی مد میں 15 لاکھ روپے کا نقصان ہو رہا ہے۔ جعفر ایکسپریس کی دو روزہ بندش سے نقصان کا تخمینہ 30 لاکھ روپے سے زائد ہو جائے گا۔ بلٹی سروس معطل ہونے سے بھی لاکھوں روپے کا اضافی خسارہ ہوگا۔

مسافروں کی پریشانی

کوئٹہ کے شہری شہباز علی نے وی نیوز سے گفتگو میں کہا کہ  ’اچانک ٹرین سروس کی بندش نے ہمیں مایوسی اور مشکلات میں ڈال دیا ہے۔ میرا 26 اگست کو اہل خانہ کے ساتھ راولپنڈی جانے کا پروگرام تھا تاکہ ایک تقریب میں شریک ہو سکوں، لیکن اب یہ ممکن نہیں رہا۔‘

انہوں نے مزید کہا کہ قومی شاہراہوں پر سیکیورٹی خدشات کے باعث بس کے ذریعے سفر محفوظ نہیں۔ ہوائی کرائے عام آدمی کی پہنچ سے باہر ہو چکے ہیں۔ اس وقت کوئٹہ سے لاہور کا ہوائی ٹکٹ 40 سے 50 ہزار روپے تک کا ہے۔

عوامی مطالبہ

شہریوں نے حکومت اور ریلوے انتظامیہ سے مطالبہ کیا ہے کہ عوام کو مناسب اور محفوظ سفری سہولیات فراہم کرنے کے لیے فوری اقدامات کیے جائیں تاکہ غریب عوام یوں مشکلات میں محصور نہ رہیں۔