بانی پاکستان تحریک انصاف (پی ٹی آئی) عمران خان کی ہمشیرہ علیمہ خان نے کہا ہے کہ عمران خان نے پارٹی رہنماؤں کو ہدایت کی ہے کہ سینیٹ کمیٹیوں سے استعفیٰ دے دیا جائے۔
یہ بھی پڑھیں: باجوڑ آپریشن اور ڈرون حملے بند کروائیں، عمران خان کی کے پی حکومت کو ہدایت
میڈیا سے گفتگو کرتے ہوئے انہوں نے کہاکہ عمران خان نے واضح طور پر کہا ہے کہ تمام سینیٹرز فوری طور پر کمیٹیوں سے مستعفی ہوں، ساتھ ہی یہ بھی عندیہ دیا کہ وہ چند دنوں میں آئندہ کا لائحہ عمل پیش کریں گے۔
عمران خان نے کہا ہے جتنے سینیٹرز سینیٹ کی قائمہ کمیٹیوں میں ہیں وہ فوری استعفی دے دیں اور خیبرپختونخوا کے ارکان صوبائی و قومی اسمبلی صوبے میں ملٹری آپریشن کے خلاف آواز اٹھائیں، اگلا لائحہ عمل کچھ دن بعد دونگا، علیمہ خان کی عمران خان سے ملاقات کے بعد گفتگو۔ pic.twitter.com/5C6dZYKTHw
— Shabbir Dar (@ShabbirDar5) September 10, 2025
علیمہ خان نے میڈیا سے گفتگو کرتے ہوئے عمران خان اور ان کی اہلیہ بشریٰ بی بی کی صحت کے حوالے سے بھی گفتگو کی۔
انہوں نے کہاکہ بانی پاکستان تحریک انصاف عمران خان کی صحت بالکل ٹھیک ہے اور اس حوالے سے پھیلائی جانے والی تمام باتیں بے بنیاد ہیں، تاہم بشریٰ بی بی کی طبیعت ناساز ہے اور انہیں چکر آنے کی شکایت ہے۔
انہوں نے بتایا کہ بشریٰ بی بی نے خود کہا کہ انہیں چلتے وقت چکر آتے ہیں، اس سلسلے میں ان کے طبی معائنے کی درخواست بھی جمع کرا دی گئی ہے۔
علیمہ خانم کے مطابق عمران خان نے پوچھا کہ آخر انہیں ہی کیوں نشانہ بنایا جا رہا ہے، جس پر میں نے جواب دیا کہ یہ چاہتے ہیں آپ کا پیغام عوام تک نہ پہنچے۔
یہ بھی پڑھیں: عمران خان کی ہدایت کے باوجود پی ٹی آئی کے 25 اراکین تاحال قائمہ کمیٹیوں سے مستعفی نہیں ہوئے
واضح رہے کہ اس سے قبل بانی پی ٹی آئی عمران خان نے پارٹی کو قومی اسمبلی کی تمام کمیٹیوں سے مستعفی ہونے کی ہدایت کی تھی۔
