پاکستان میں پانچ روز قبل تحریک انصاف کے احتجاج سے نمٹنے کے لیے بند کیا گیا انٹرنیٹ پیر کو مکمل بحال کر دیا گیا۔
ابتدا میں موبائل براڈ بینڈ انٹرنیٹ بھی مکمل طور پر بند رکھا گیا تھا جسے جزوی طور پر بحال کر دیا گیا تھا تاہم سوشل میڈیا ایپس باالخصوص ٹوئٹر، فیس بک اور یوٹیوب نہ کھلنے کی شکایات باقی تھیں۔
پاکستان ٹیلی کیمونیکیشن اتھارٹی (پی ٹی اے) کا کہنا تھا کہ حکومت کی ہدایت پر انٹرنیٹ سروسز محدود کی گئی ہیں اور اسی کی ہدایت پر بحال کی جائیں گی۔
انٹرنیٹ کی بندش کے دوران سامنے آنے والی رپورٹس میں ٹیلی کام، سافٹ وئیر، بینکنگ انڈسٹری کو پہنچنے والے مالی نقصانات کی رپورٹس تواتر سے سامنے آتی رہیں تاہم مواصلاتی خدمات مکمل طور پر بحال نہیں ہو سکی تھیں۔
پیر کی سہ پہر مختلف ٹوئپس نے اپنے پیغامات میں لکھا کہ وہ اب سوشل میڈیا ایپس استعمال کر سکتے ہیں۔
Internet services have been completely restored in Pakistan including the social media apps comprising Twitter, Facebook, Instagram and YouTube.
— Wajahat Kazmi (@KazmiWajahat) May 15, 2023
موقع کوئی بھی ہو، مقام ڈیجیٹل میڈیا کا ہو اور گفتگو کرنے والے سوشل میڈیا صارفین ہوں تو بھلا یہ کیسے ہو سکتا ہے کہ مزاح کا استعمال نہ کیا جائے۔ اس مرتبہ بھی کچھ ایسا ہی ہوا تو شارک مچھلی کی تصویر شیئر کرتے ہوئے لکھا گیا کہ ’شارک بہت خوش ہے کہ تاریخ میں پہلی مرتبہ انٹرنیٹ کیبل کاٹنے کا الزام اس پر نہیں لگا۔‘
شارک بہت خوش ہے
کہ تاریخ میں پہلی دفعہ انٹرنیٹ کیبل کاٹنے کا الزام اس پر نہیں لگا 🫤 pic.twitter.com/w3d407wAXf— Rubab Hayat (@shuglisam) May 15, 2023
پاکستان میں 12 کروڑ سے زائد افراد براڈ بینڈ انٹرنیٹ استعمال کرتے ہیں۔
انفارمیشن اینڈ کمپیوٹر ٹیکنالوجی سے وابستہ ماہرین کے مطابق محض دو فیصد افراد فکسڈ لائن کے ذریعے انٹرنیٹ استعمال کرتے ہیں، بڑی اکثریت انٹرنیٹ تک رسائی کے لیے موبائل فونز پر انحصار کرتی ہے۔
