قائم مقام صدر یوسف رضا گیلانی سے ایتھوپیا کے سفیر ڈاکٹر جمال بکر عبداللّٰہ نے الوداعی ملاقات کی۔
اس موقع پر قائم مقام صدر نے پاک۔ایتھوپیا تعلقات کے فروغ کے لیے سفیر کی خدمات کو سراہا۔ انہوں نے کہا کہ ڈاکٹر جمال بکر عبداللّٰہ نے سیاسی، اقتصادی اور عوامی روابط کو بڑھانے میں کلیدی کردار ادا کیا۔ گیلانی نے گرین پاکستان اقدام اور ماحولیاتی تبدیلی کے حوالے سے سفیر کی کاوشوں کو بھی خراجِ تحسین پیش کیا۔
یہ بھی پڑھیے: ایتھوپین فضائیہ کے کمانڈر کا ایئر ہیڈکوارٹرز کا دورہ، ایئرچیف سے ملاقات، دوطرفہ تعاون پر اتفاق
ملاقات میں ایتھوپیا کے سفیر نے کہا کہ افریقہ سید یوسف رضا گیلانی کی قیادت اور کردار کا معترف ہے۔ انہوں نے کہا کہ ایتھوپیا پاکستان کو مخلص اور برادر ملک سمجھتا ہے اور پورا افریقہ پاکستان کو خیر خواہ اور دوست ملک کے طور پر دیکھتا ہے۔
ڈاکٹر جمال بکر عبداللّٰہ نے مزید کہا کہ افریقہ ڈے کی تقریبات اور سینیٹ کی قرارداد ہمیشہ تمام افریقی ممالک کو یاد رہیں گی۔ ان کا کہنا تھا کہ پاکستان ایک مضبوط اور باصلاحیت ملک ہے اور ہمیشہ ان کے دل کے قریب رہے گا۔
