راولپنڈی میں ٹریفک نظام درہم برہم، بیشتر شاہراہیں بند، شہریوں کو غیر ضروری سفر سے گریز کی ہدایت

راولپنڈی ٹریفک پولیس کی جانب سے جاری کردہ روڈ سچویشن رپورٹ کے مطابق شہر کے بیشتر اہم راستے سیکیورٹی وجوہات کی بنا پر بند کر دیے گئے ہیں، جس کے باعث شہریوں کو شدید مشکلات کا سامنا ہے۔

اہم شاہراہیں مکمل بند

رپورٹ کے مطابق فیض آباد، مری روڈ، فائزالاسلام، کمیٹی چوک، لیاقت باغ، چاندنی چوک، 6th روڈ چوک، مریڑ چوک، راولپنڈی صدر، شمس آباد اور ڈبل روڈ سمیت 20 سے زائد مقامات پر ٹریفک مکمل طور پر بند ہے۔

یہ بھی پڑھیں:پنجاب بھر میں کریک ڈاؤن، جڑواں شہروں میں اسکولز بند، ٹی ایل پی کا آج دوپہر اسلام آباد کے لیے روانگی کا اعلان

اسی طرح چکری، تھالیان، فتح جنگ ٹول پلازہ، مندرہ، داؤلتالہ، نکا کہیابان، نکا محراباد اور کورال چوک بھی بند ہیں۔

جزوی طور پر کھلے راستے

ٹریفک پولیس کے مطابق چند مقامات پر سنگل لائن ٹریفک کی اجازت دی گئی ہے، جن میں راولپنڈی-اسلام آباد کی سمت نکا گلزار، راحیلہ آباد فلائی اوور، اور مارگلہ ٹرن شامل ہیں۔

راولپنڈی صدر کا حیدر روڈ تا سوزوکی اسٹینڈ کا راستہ جزوی طور پر کھولا گیا ہے۔

موٹرویز کی صورتحال

• ایم-1 موٹروے پشاور کی سمت کھلی ہے، لیکن راولپنڈی کی طرف بند ہے۔
• ایم-2 موٹروے لاہور اور راولپنڈی دونوں سمتوں میں مکمل طور پر بند ہے۔

شہریوں کے لیے ہدایت

ٹریفک پولیس نے شہریوں کو ہدایت کی ہے کہ وہ غیر ضروری سفر سے گریز کریں، اور نکلنے سے قبل راولپنڈی ٹریفک پولیس ہیلپ لائن یا سوشل میڈیا اکاؤنٹس سے تازہ ترین صورتحال ضرور معلوم کریں۔

یہ بھی پڑھیں:فیض آباد احتجاج کے باعث اسلام آباد میں ہیوی ٹریفک کا داخلہ بند، ٹریفک ڈائیورشن پلان جاری

ٹریفک پولیس راولپنڈی کے مطابق یہ اقدامات امن و امان کی صورتحال کے پیشِ نظر کیے گئے ہیں، اور حالات بہتر ہونے پر راستے بتدریج کھول دیے جائیں گے۔