بھارت کی ریاست بہار کے گاؤں کونچی میں ایک غیر معمولی اور حیرت انگیز واقعہ پیش آیا جہاں 74 سالہ ریٹائرڈ فوجی افسر موہن لال نے اپنی زندگی میں ہی اپنی آخری رسومات کا اہتمام کیا تاکہ یہ جان سکیں کہ ان کے انتقال پر کون لوگ ان سے سچی عقیدت اور محبت رکھتے ہیں۔
موہن لال، جو بھارتی فضائیہ میں بطور وارنٹ آفیسر خدمات انجام دے چکے ہیں، نے مکمل ہندو رسومات کے ساتھ اپنی ’ارتھی‘ نکلوائی۔ سفید کفن میں لپٹے ہوئے، انہوں نے اپنے رشتہ داروں سے درخواست کی کہ وہ انہیں شمشان گھاٹ تک لے جائیں۔ جنازے کے دوران روایتی نعرے ’رام نام ستیہ ہے‘ لگائے گئے، اور متعدد افراد اس جلوس میں شریک ہوئے۔
Bihar Air Force Veteran Holds His Own Funeral to See How People Would Honour Him
-74-year-old Mohan Lal staged his own funeral in Gaya, lying on a bier in a white shroud.
-Villagers joined, chanting “Ram Naam Satya Hai.”
-A symbolic effigy was cremated, followed by a community… pic.twitter.com/AwotDxoZor— Sapna Madan (@sapnamadan) October 14, 2025
جب جلوس شمشان گھاٹ پہنچا تو موہن لال نے سب کو اس وقت حیرت میں ڈال دیا جب وہ خود اپنی ’ارتھی‘ سے اٹھ کر بیٹھ گئے۔ انہوں نے اعلان کیا کہ یہ تمام کارروائی ایک سوچا سمجھا عمل تھا، جس کا مقصد یہ جاننا تھا کہ ان کے جانے پر کون ان کی قدر کرتا ہے۔ بعد ازاں انہوں نے اپنی ارتھی کو علامتی طور پر نذرِ آتش کیا اور پس منظر میں مشہور گانا ’چل اُڑ جا رے پنچھی، اب دیس ہوا بیگانہ‘ بجایا گیا۔
یہ بھی پڑھیں: طلاق مبارک ہو، بھارتی شخص کا دودھ سے غسل اور کیک کاٹ کر جشن، ویڈیو وائرل
موہن لال نے اس موقع پر کہا کہ ان کے گاؤں میں برسات کے موسم میں آخری رسومات کی ادائیگی میں مشکلات پیش آتی ہیں، جس کے پیش نظر انہوں نے ایک باقاعدہ شمشان گھاٹ ’مکتی دھام‘تعمیر کروایا ہے۔ اپنی فرضی آخری رسومات اسی مکتی دھام کے افتتاح کے طور پر منعقد کی گئیں تاکہ عوام کی شرکت اور جذبات کا مشاہدہ کیا جا سکے۔
موہن لال کا کہنا تھا کہ میری زندگی کا مقصد ہمیشہ دوسروں کی خدمت رہا ہے۔ آج میں نے دیکھا کہ لوگ واقعی میری قدر کرتے ہیں اس سے زیادہ خوشی میرے لیے کیا ہو سکتی ہے۔ تقریب کے اختتام پر موہن لال نے تمام شرکاء کے لیے دعوت کا اہتمام بھی کیا، جس میں گاؤں کے سینکڑوں افراد نے شرکت کی۔
یہ بھی پڑھیں: بیوی پر رات میں ناگن بننے کا الزام، حاملہ خاتون نے شوہر کے الزامات پر کیا ردعمل دیا؟
یہ واقعہ سوشل میڈیا پر بھی موضوعِ بحث بن گیا ہے، جہاں بعض صارفین نے اسے ایک جذباتی تجربہ قرار دیا، جبکہ کچھ افراد نے اس اقدام کو سابق فوجی افسر کے شایانِ شان نہ سمجھا۔ ایک صارف نے بیلجیئم کے ایک مشہور واقعے کا حوالہ دیتے ہوئے لکھا کہ جون 2023 میں ایک ٹک ٹاکر نے بھی اسی نوعیت کا تجربہ کیا تھا تاکہ اپنے رشتہ داروں کی محبت کا امتحان لے سکے۔
