ترجمان اسلام آباد پولیس کے مطابق وفاقی دارالحکومت میں فول پروف سیکیورٹی یقینی بنانے کے لیے بڑے پیمانے پر گرینڈ کومبنگ اور سرچ آپریشنز جاری ہیں۔
آئی جی اسلام آباد کی ہدایت پر شہر کے مختلف علاقوں میں مشترکہ سرچ آپریشنز کیے جا رہے ہیں، جن میں تھانہ کرپا، سمبل، سیکرٹریٹ، کھنہ، انڈسٹریل ایریا، بنی گالہ اور ترنول کے علاقے شامل ہیں۔
مزید پڑھیں:اسلام آباد پولیس کا شہریوں سے زیادہ کرایہ وصول کرنے والے ٹرانسپورٹرز کے خلاف کریک ڈاؤن
یہ آپریشنز ایس ایس پی آپریشنز قاضی علی رضا کی نگرانی اور زونل ایس پیز کی سربراہی میں کیے گئے، جن میں لیڈیز پولیس نے بھی حصہ لیا۔
پولیس کے مطابق کارروائی کے دوران 712 افراد اور 1108 گھرانوں کی جانچ پڑتال کی گئی، جبکہ 182 دکانوں اور 32 ہوٹلز کو بھی چیک کیا گیا۔
اسی دوران 381 موٹر سائیکلوں اور 141 گاڑیوں کی بھی اسکریننگ کی گئی۔ کارروائی کے دوران 20 افغان شہریوں، 56 مشکوک افراد، 2 گاڑیوں اور 47 موٹر سائیکلوں کو مزید تفتیش کے لیے متعلقہ تھانوں میں منتقل کیا گیا۔
پولیس نے غیر قانونی اسلحہ رکھنے والے ملزمان کو گرفتار کرتے ہوئے 4 پستول معہ ایمونیشن بھی برآمد کیے۔
مزید پڑھیں: 3 فروری کو کن اوقات میں ٹریفک کی روانی متاثر رہے گی؟ اسلام آباد پولیس کی ایڈوائزری جاری
ترجمان کے مطابق شہر کے داخلی و خارجی راستوں پر خصوصی چیکنگ پوائنٹس قائم کیے گئے ہیں جبکہ پٹرولنگ یونٹس اور خصوصی سکواڈ مسلسل گشت کر رہے ہیں۔
حکام کا کہنا ہے کہ سینئر افسران فیلڈ میں موجود ہیں اور سکیورٹی صورتحال کی خود نگرانی کر رہے ہیں، جبکہ شہریوں سے اپیل کی گئی ہے کہ وہ چیکنگ کے دوران پولیس سے تعاون کریں اور کسی بھی مشکوک سرگرمی کی فوری اطلاع دیں۔
