محکمہ موسمیات نے ملک میں غیر معمولی یا ریکارڈ توڑ سردی کی سوشل میڈیا پر گردش کرتی خبروں کو مسترد کر دیا ہے۔ محکمہ کا کہنا ہے کہ سائنسی اعداد و شمار اور موسمیاتی رجحانات ایسی کسی پیش گوئی کی تائید نہیں کرتے۔
ترجمان کے مطابق، سمندری سطح کے درجہ حرارت اور لا نینا (La Niña) کے اثرات کا تجزیہ ظاہر کرتا ہے کہ ملک بھر، بشمول سندھ، میں موسمِ سرما کی شدت اعتدال پسند رہے گی۔
مزید پڑھیں: دھند، بارش اور برفباری، سردی نے ملک میں ڈیرے جما لیے
محکمہ موسمیات نے واضح کیا کہ دسمبر سے فروری تک کے موسمِ سرما کی پیش گوئیاں عالمی موسمیاتی تنظیم (WMO) کے تعاون سے تیار کردہ سسٹمز کے ذریعے کی جاتی ہیں۔
تازہ ترین جائزوں کے مطابق، اس دوران ملک کے بیشتر حصوں میں درجہ حرارت معمول سے قدرے زیادہ اور بارشیں معمول سے کچھ زیادہ رہنے کا امکان ہے۔
بیان میں کہا گیا کہ بحرالکاہل کے خطے میں کمزور سے درمیانے درجے کی لا نینا موجود ہے، جو عام طور پر جنوبی ایشیا اور پاکستان میں سردی کے نظاموں کی شدت کو کم کرتی ہے۔ نتیجتاً، مغربی ہوائیں ملک کے شمالی اور مغربی پہاڑی علاقوں تک مکمل طور پر نہیں پہنچ پائیں گی، جس سے ان علاقوں میں برفباری اور بارش میں کمی جبکہ پنجاب اور سندھ کے میدانوں میں ہلکی تبدیلی متوقع ہے۔
مزید پڑھیں: ملک کے مختلف علاقوں میں بارش اور برفباری، سردی کی شدت میں اضافہ
محکمہ موسمیات نے شہریوں کو ہدایت کی ہے کہ وہ صرف محکمہ موسمیات کی ویب سائٹ اور تصدیق شدہ ذرائع سے ہی موسمی معلومات حاصل کریں۔ محکمہ نے خبردار کیا کہ غیر مصدقہ موسمی دعوے پھیلانے سے عوام میں بلاوجہ خوف اور غلط فہمی پیدا ہوسکتی ہے۔
