وفاقی وزیر مذہبی امور سردار محمد یوسف کی زیر صدارت قومی علماء و مشائخ کونسل کا دوسرا اجلاس آج (بدھ) اسلام آباد میں منعقد ہوگا۔
کونسل میں ملک بھر کے تمام مسالک کے جید علمائے کرام کو نمائندگی حاصل ہے، جبکہ چاروں صوبوں، گلگت بلتستان اور آزاد جموں و کشمیر کے وزرائے اوقاف و مذہبی امور بھی کونسل کا حصہ ہیں۔
کونسل کے قیام کا مقصد مختلف معاشرتی مسائل کی نشاندہی، اصلاح اور ان کے حل کے لیے علمائے کرام سے رہنمائی و مشاورت حاصل کرنا ہے۔
مزید پڑھیں: مذہبی اور مسلکی رواداری کے فروغ کے لیے علما کی جانب سے ہر ممکن اقدامات کیے جائیں گے، علامہ طاہر اشرفی
وفاقی وزیر سردار محمد یوسف نے وزارت سنبھالنے کے بعد گزشتہ دورِ حکومت میں قائم ہونے والی کونسل کو دوبارہ فعال بنایا تھا اور 4 ماہ قبل اس کا تعارفی اجلاس طلب کیا تھا۔
دوسرے اجلاس میں اسلام کی اہمیت اجاگر کرنے، معاشرے میں اس کی ترویج اور اصلاحِ احوال سے متعلق اہم امور زیر بحث آئیں گے۔ اجلاس میں طے شدہ متفقہ سفارشات کو منظوری کے بعد وزارت مذہبی امور کے ذریعے متعلقہ محکموں کو ارسال کیا جائے گا۔
