سینیٹر انوار الحق کاکڑ نے 9 مئی کو ہونے والے واقعات کی مذمت کرتے ہوئے کہا ہے کہ سرکاری و عسکری اثاثوں پر حملوں کی کسی صورت اجازت نہیں دی جاسکتی اور اس دن کو سیاہ ترین دن کے طور پر ہمیشہ یاد رکھا جائے گا۔
کوئٹہ میں پریس کانفرنس کرتے ہوئے سینٹر انوار الحق کاکڑ نے کہا کہ فوجی ایکٹ کے تحت عدالتیں صرف مارشل لا وقت میں قائم رہنے کا تاثر غلط ہے۔ انہوں نے مزید کہا کہ عدالتوں پر عدم اعتماد نہیں لیکن فوری انصاف کے لیے ملٹری کورٹس ناگزیر ہیں اور جو لوگ مذکورہ واقعات میں ملوث ہیں یا سپورٹ کررہے ہیں ان کے خلاف آرمی ایکٹ کے تحت کارروائی ہونی چاہیے۔
انہوں نے سوال کیا کہ کیا کور کمانڈر کے گھر پر حملہ نہیں کیا گیا اور کیا توڑ پھوڑ نہیں کی گئی۔ انہوں نے کہا کہ ریڈ لائن کو کراس کیا گیا اور ایسے میں خاموشی بھی جرم بن جاتی ہے۔ انہوں نے مزید کہا کہ تمام طبقوں کے مخصوص سیکشنز نے عمران خان کو بنایا اور ہم کسی طبقے کی نہیں بلکہ صرف عمران خان کی مذمت کرتے ہیں۔
انوار الحق کاکڑ نے کہا کہ عمران خان سیاسی شہید بنتے ہے یا نہیں وہ الگ بات ہے اور وہ ہیرو بھی بن سکتے ہیں اور ولن بھی تاہم جن لوگوں نے عمران خان کو بنایا ہم اس کی مذمت کرتے ہیں۔ انہوں نے مزید کہا کہ عمران خان کو سپورٹ کرنے والوں نے اس لیے سپورٹ نہیں کیا کہ وہ ریاست پر حملہ کریں۔
انہوں نے اس ضرورت پر زور دیا کہ پاکستانی اسٹیبلشمنٹ کا کردار سیاست میں کم ہونا چاہیے تاہم فوجی تنصیبات پر حملے کیخلاف ہم سب متحد ہیں۔ پریس کانفرس میں ایم این اے روبینہ عرفان، صوبائی وزیر گہرام بگٹی، مشیر خلیل جارج بھی موجود تھے۔
