وزیراعظم پاکستان کے مشیر برائے سیاسی امور سینیٹر رانا ثنااللہ نے کہا ہے کہ خیبرپختونخوا میں گورنر راج لگانے سے متعلق کوئی معاملہ زیر غور نہیں۔
نجی ٹی وی سے گفتگو کرتے ہوئے انہوں نے کہاکہ وزیراعلیٰ سہیل آفریدی اگر اپنا لہجہ اور الفاظ درست کریں تو شاید مسائل کا کوئی حل نکل آئے۔
یہ بھی پڑھیں: عمران خان کی ہدایت کے باوجود خیبر پختونخوا کابینہ کی تشکیل میں تاخیر کیوں؟
انہوں نے کہاکہ عمران خان کو وزیراعظم کی پیشکش پر میثاق استحکام پاکستان کرنا چاہیے، ہم ہر حال میں آگے بڑھنا چاہتے ہیں، تاکہ ملک ترقی کرے۔
رانا ثنااللہ نے کہاکہ عدالت نے ایسا کوئی حکم نہیں دیا کہ سہیل آفریدی کی عمران خان سے ملاقات کرائی جائے، جب عدالت حکم دے گی تو ملاقات کرا دی جائےگی۔
انہوں نے کہاکہ سیاست دان جب تک ٹیبل پر بیٹھ کر اپنے لیے کوئی رولز طے نہیں کرلیتے تب تک جوتیوں میں دال بٹتی رہے گی۔
مشیر وزیراعظم نے کہاکہ معرکہ حق میں ہم نے اپنے سے کئی گنا بڑے دشمن کو شکست دی، فیلڈ مارشل عاصم منیر میں خالد بن ولید جیسے اوصاف پائے جاتے ہیں۔
یہ بھی پڑھیں: پی ٹی آئی نے اسلام آباد آنے کی کوشش کی تو اس بار سخت جواب دیا جائےگا، رانا ثنااللہ کا انتباہ
پاک افغان تعلقات سے متعلق پوچھے گئے ایک سوال کے جواب میں انہوں نے کہاکہ میں اس معاملے پر فیلڈ مارشل عاصم منیر کے مؤقف کے ساتھ کھڑا ہوں، اور امید ہے کہ افغانستان کی مزید تسلی اور تشفی کرانے کے بعد پھر مذاکرات بھی کامیاب ہو جائیں گے۔
