خیبرپختونخوا سے سینیٹر منتخب ہونے والے پی ٹی آئی رکن خرم ذیشان کا کہنا ہے کہ ان کا پہلا ہدف عمران خان کی رہائی ہے، وہ ایوان کے اندر یہ لڑائی لڑیں گے۔
خرم ذیشان نے کہا کہ سینیٹر منتخب کروانے پر عمران خان، وزیراعلیٰ خیبرپختونخوا اور پارٹی کے صوبائی نمائندوں و ورکرز کا شکریہ ادا کرتا ہوں، اللہ سے دعا ہے کہ اللہ مجھے اپنا بندہ بناکے رکھنا، کبھی ایوان، اقتدار، کرسی کا بندہ نہ بنانا۔
خرم ذیشان نے کہا کہ ہمارا مقصد ملکی استحکام و خوشحالی ہے، ہم میدان سے جنگ اب ایوان میں بھی لے کرجائیں گے، ہمارا پہلا ہدف عمران خان کی رہائی ہے۔
Congratulations cheetah @khurramzeeshan pic.twitter.com/4EKURdmv3J
— Sohail Afridi (@SohailAfridiISF) October 30, 2025
خیبر پختونخوا میں سینیٹ کی خالی نشست پر ہونے والے ضمنی انتخاب میں پاکستان تحریک انصاف (پی ٹی آئی) کے امیدوار خرم ذیشان سینیٹر منتخب ہوگئے۔
یہ بھی پڑھیں: عمران خان کی ہدایت پر پی ٹی آئی سینیٹ کی کتنی کمیٹیوں کی سربراہی سے مستعفی ہوجائے گی؟
الیکشن کمیشن کے مطابق خرم ذیشان نے 91 ووٹ حاصل کیے جبکہ اپوزیشن کے امیدوار تاج محمد آفریدی کو 45 ووٹ ملے، مجموعی طور پر 137 ووٹ پول ہوئے جن میں سے ایک ووٹ مسترد کردیا گیا۔
وزیراعلیٰ خیبر پختونخوا سہیل آفریدی نے خرم ذیشان کو کامیابی پر مبارکباد دیتے ہوئے کہا کہ یہ جیت سچ، عوامی امانت اور عمران خان کے نظریے کی جیت ہے۔ ان کا کہنا تھا کہ آج کے فیصلے نے ثابت کردیا کہ خیبر پختونخوا اسمبلی نے ضمیر کے مطابق ووٹ دیا ہے۔
یہ بھی پڑھیں: شبلی فراز کی خالی نشست پر ووٹنگ جاری، پی ٹی آئی میں اختلاف سامنے آگیا
سہیل آفریدی نے مزید کہا کہ یہ کامیابی عمران خان کے وژن، اصولی سیاست اور عوامی خدمت کے عزم کی توثیق ہے۔ سینیٹ نشست پر پی ٹی آئی کی فتح قوم کے بہتر مستقبل کی امید ہے۔ وزیراعلیٰ کے مطابق خیبر پختونخوا نے ایک بار پھر عمران خان کے نظریے پر اعتماد کا اظہار کیا ہے۔
انہوں نے کہا کہ یہ جیت اس تحریک کا تسلسل ہے جو ملک میں حقیقی آزادی، قانون کی بالادستی، انصاف اور خودداری کے لیے جاری ہے۔
یا د رہے کہ یہ نشست سینیٹر شبلی فراز کی نااہلی کے بعد خالی ہوئی تھی، جنہیں الیکشن کمیشن نے اثاثوں کی تفصیلات میں تضاد کے باعث نااہل قرار دیا تھا۔
