نیب نے پنجاب میں مفت آٹا اسکیم میں مبینہ بے ضابطگیوں اور کرپشن الزامات کی انکوائری کا فیصلہ کیا ہے۔
نیب کی جانب سے جاری اعلامیے میں بتایا گیا ہےکہ نگران وزیراعلٰی پنجاب محسن نقوی نے اس معاملے پر تحقیقات کی درخواست کی تھی۔
خیال رہےکہ کچھ روز قبل نگران پنجاب حکومت نے مفت آٹا اسکیم کے آڈٹ کرانےکا اعلان کیا تھا۔ ایک بیان میں محسن نقوی کا کہنا تھا کہ آڈٹ کا فیصلہ ن لیگ کے بعض رہنماؤں کی جانب سے اسکیم پر الزامات اور پروپیگنڈے کے بعد کیا ہے۔
محسن نقوی کا کہنا تھاکہ چیئرمین نیب کوبھی درخواست بھیجی ہےکہ پروگرام کی جانچ پڑتال کریں، آڈٹ میں کوئی بےضابطگی پائی گئی تو قانون اپنا راستہ خود اپنائےگا۔
واضح رہے کہ مسلم لیگ (ن) کے سینیئر رہنما و سابق وزیراعظم شاہد خاقان عباسی نے الزام لگایا تھا کہ حکومت کی مفت آٹا اسکیم میں 20 ارب روپے سے زائد کی کرپش ہوئی ہے۔ اپنے بیان پر سخت رد عمل کے بعد انہوں نے وضاحت کی تھی کہ ان کا اشارہ نظام میں موجود کرپشن کی شرح کے حساب سے تھا نہ کہ کس وزیر کی۔
