پاکستان میں فرانس کے سفیر نکولس گیلے نے کہا ہے کہ فرانسیسی سفارت خانہ فرانس میں پاکستانی نوجوانوں کے لیے تعلیمی وظائف کی فراہمی اور تعلیمی مواقعوں میں اضافہ کرے گا تاکہ وہ فرانس میں اعلیٰ تعلیم کے وسیع مواقعوں سے فائدہ اٹھا سکیں جہاں بیشتر اداروں میں انگلش پڑھائی جاتی ہے۔
اسلام آباد میں فرانسیسی ایلومنائی ڈے سے خطاب کرتے ہوئے فرانس کے سفیر نکولس گیلے نے کہا کہ دونوں ممالک دو طرفہ تعلقات اور تعاون کو بڑھانے بالخصوص اعلیٰ تعلیم کے فروغ کے لیے کام کر رہے ہیں۔ انہوں نے کہا کہ یہ دن تمام ممالک کے سیکڑوں اور ہزاروں لوگوں کو دوبارہ جوڑنے کے لیے منایا جا رہا ہے جنہوں نے اعلیٰ تعلیم اور پیشہ ورانہ تربیت حاصل کی، یا اس کا کچھ حصہ فرانسیسی یونیورسٹیوں یا دیگر تعلیمی اداروں میں حاصل کیا۔
فرانس کے سفیر نے اس بات پر زور دیا کہ فرانسیسی ایلومنائی پاکستان، پاکستانیوں کا پلیٹ فارم ہے جنہوں نے فرانسیسی جامعات میں تعلیم حاصل کی ہے، یہ ادارہ نوجوان نسل کو باوقار اداروں کا انتخاب کرنے کی ترغیب دے سکتا ہے تاکہ وہ کامیاب کیریئر کی تعمیر کے لیے ان باوقار اداروں کا انتخاب کریں۔
انہوں نے کہا کہ اعلیٰ تعلیم میں پاکستان اور فرانس کے درمیان تعلقات 1960 کی دہائی کے اوائل سے ہیں، حال ہی میں پاکستانی طلباء کی تعداد میں کمی آئی ہے۔ پھر بھی فرانسیسی سفارت خانہ پاکستانی حکام کے تعاون سے اس صورتحال کو تبدیل کرنے کے لیے پُر عزم ہے۔
نکولس گیلے نے کہا کہ فرانسیسی جامعات میں پاکستانی طلبا کی تعداد بڑھانے کی کوششیں 2003 میں اس وقت شروع ہوئیں جب ہائیر ایجوکیشن کمیشن (ایچ ای سی) نے فرانس میں پی ایچ ڈی کے لیے سکالرشپ پروگرام شروع کیا۔ فرانس میں اب تک 670 پاکستانی طلباء اعلیٰ تعلیم حاصل کر چکے ہیں۔
پاکستان میں فرانس کے سفیر نے کہا کہ فرانسیسی حکومت اور جامعات پاکستانی طلبا کے لیے سالانہ 30 وظائف کی فنڈنگ کرتی ہیں جبکہ یورپی ممالک میں بھی ہر سال درجنوں طالب علموں کو اسکالر شپ دیا جاتا ہے۔
