آپریشن سندور میں بھارت کے کتنے اور کون کون سے جنگی طیارے تباہ ہوئے، تفصیلات سامنے آگئیں

برطانوی دفاعی جریدے Key Aero کی تحقیقی رپورٹ کے مطابق رواں برس مئی میں پاکستان اور بھارت کے درمیان ہونے والی فضائی جنگ میں بھارتی فضائیہ کے 4 رافیل لڑاکا طیارے تباہ ہوئے۔ یہ پہلی بار ہے کہ کسی فضائیہ نے سائبر اور روایتی عسکری کارروائیوں کو یکجا کر کے دشمن کو مفلوج کیا۔

یہ  بھی پڑھیں:رافیل اور ایس-400 دفاعی نظام کی تباہی پاکستان کی عسکری برتری کا ثبوت ہے، سابق بھارتی آرمی چیف کا اعتراف

رپورٹ میں بتایا گیا کہ مئی میں ہونے والی 52 منٹ کی فضائی جنگ میں بھارتی فضائیہ کے رافیل طیارے بی ایس 001، بی ایس 021، بی ایس 022 اور بی ایس 027 گرائے گئے۔ بھارت ان طیاروں کے سیریل نمبرز کے ساتھ واضح تصاویر فراہم کرنے میں ناکام رہا۔

پاکستانی ملٹی ڈومین آپریشنز

Key Aero کی رپورٹ کے مطابق پاکستانی ملٹی ڈومین آپریشنز نے بھارتی فضائیہ کو مفلوج کیا، اور اس دوران 4 رافیل طیاروں کے علاوہ مگ 29، ایس یو 30 اور ہیرون ڈرون بھی تباہ ہوئے۔

رپورٹ میں مزید کہا گیا کہ 10 مئی کو جے ایف 17 سی بلاک 3 نے ادھم پور میں بھارتی دفاعی نظام ایس 400 کو تباہ کیا، جبکہ برنالا میں بھارتی کمانڈ اینڈ کنٹرول سسٹم کو بھی نشانہ بنایا گیا۔

سائبر اور روایتی عسکری اقدامات

رپورٹ کے مطابق پاکستانی سائبریونٹس نے بھارت کے تقریباً 96 فیصد سوشل نیٹ ورکس اور ڈیجیٹل نظام کو مفلوج کیا۔ یہ کارروائی سائبر اور روایتی عسکری اقدامات کو یکجا کرنے کی پہلی مثال ہے۔

Key Aero نے بتایا کہ بھارتی چیف آف ڈیفنس اسٹاف جنرل انیل چوہان نے انٹرویو میں بھارتی طیاروں کی تباہی تسلیم کی تھی۔ اس سے قبل پاکستانی فضائیہ نے آپریشن سوئفٹ ریٹارٹ کے دوران بھارتی مگ 21 طیارہ مار گرایا تھا۔