وزیراعلیٰ بلوچستان میر سرفراز بگٹی نے سانحہ آرمی پبلک اسکول پشاور کے موقع پر اپنے پیغام میں معصوم بچوں، اساتذہ کرام اور سیکیورٹی اہلکاروں کو خراجِ عقیدت پیش کرتے ہوئے کہا ہے کہ ان کی قربانیاں دہشت گردی کے خلاف قومی عزم کی بنیاد ہیں۔
وزیر اعلیٰ بلوچستان میر سرفراز بگٹی نے اپنے پیغام میں کہا کہ پوری قوم آج بھی آرمی پبلک اسکول پشاور کے عظیم اور بہادر شہدا کی قربانیوں کو سلام پیش کرتی ہے، جنہوں نے ملک کی تاریخ کا ایک ناقابلِ فراموش باب رقم کیا۔
یہ بھی پڑھیں:سپریم کورٹ بار ایسوسی ایشن کا سقوط ڈھاکا اور سانحہ اے پی ایس کے شہدا کو خراج تحسین
انہوں نے کہا کہ سانحہ اے پی ایس نہ صرف شہداء کی یاد تازہ کرنے کا دن ہے بلکہ اس عہد کی تجدید کا موقع بھی ہے کہ وطنِ عزیز کے تحفظ کے لیے ہر قربانی دی جائے گی، مگر مادرِ وطن پر کبھی آنچ نہیں آنے دی جائے گی۔
میر سرفراز بگٹی نے واضح کیا کہ آرمی پبلک اسکول کے معصوم بچوں، اساتذہ کرام اور سیکیورٹی اہلکاروں کا خون ہرگز رائیگاں نہیں جائے گا، اور ان کی قربانیاں دہشتگردی کے خلاف قومی عزم کی مضبوط بنیاد ہیں۔
وزیر اعلیٰ بلوچستان نے کہا کہ سانحہ اے پی ایس نے بزدل، انسانیت سے عاری اور درندہ صفت دہشت گردوں کے مکروہ چہروں کو پوری دنیا کے سامنے بے نقاب کر دیا، جو نہ معصوم بچوں کو بخش سکے اور نہ ہی انسانیت کی کوئی رمق رکھتے تھے۔
انہوں نے اس عزم کا اعادہ کیا کہ دہشتگردی کے خلاف جنگ اور جدوجہد پوری قوت کے ساتھ جاری ہے اور ان شاء اللہ اس میں فتح پاکستان اور پاکستانی عوام کا مقدر بنے گی۔
میر سرفراز بگٹی نے مادرِ وطن کے تحفظ میں اپنی جانوں کا نذرانہ پیش کرنے والے سیکیورٹی فورسز کے جوانوں کو ملک و قوم کے ہیرو اور محسن قرار دیتے ہوئے کہا کہ ان کی قربانیاں قوم کے حوصلے، اتحاد اور استقامت کی علامت ہیں۔
