پاکستان تحریک انصاف (پی ٹی آئی) کے سیکریٹری جنرل سلمان اکرم راجا نے کہا ہے کہ بانی پی ٹی آئی عمران خان کی بہنوں سے یکجہتی کے لیے سب کو اس موقع پر موجود ہونا چاہیے، کیونکہ یہ صرف ارکان اسمبلی کی ذمہ داری نہیں۔
اڈیالہ جیل کے قریب فیکٹری ناکے میں میڈیا سے گفتگو کرتے ہوئے ان کا کہنا تھا کہ کوئی بھی انسان یہ نہیں بتا سکتا کہ ملاقات میں کس بارے میں بات کی جائے اور کس پر خاموش رہنا ضروری ہے۔
مزید پڑھیں: ’اڈیالہ پہنچو‘: پی ٹی آئی رہنماؤں اور کارکنوں کے لیے اہم ہدایات جاری
سلمان اکرم راجا نے کہاکہ جو لوگ جمہوریت اور قانون کی بالادستی پر یقین رکھتے ہیں، وہ اس موقع پر ضرور موجود ہوں۔
انہوں نے سانحہ اے پی ایس کو انتہائی افسوسناک قرار دیتے ہوئے کہا کہ دہشتگردی کے واقعات دوبارہ بڑھ رہے ہیں، اور قبائلی علاقوں کے انضمام کے بعد وہاں کے لوگوں کے ساتھ کیے گئے وعدے پورے نہیں کیے گئے۔
انہوں نے بتایا کہ جیل کے رولز میں سیاسی گفتگو سے متعلق شق جنرل ضیاالحق کے دور میں شامل کی گئی تھی، تاہم کسی انسان کی زبان بندی کرنے کا دنیا کا کوئی قانون اجازت نہیں دیتا۔
واضح رہے کہ آج جیل میں عمران خان سے ملاقات کا دن ہے، تاہم دوسری جانب حکومت نے بانی پی ٹی آئی سے ملاقاتوں پر پابندی عائد کررکھی ہے۔
مزید پڑھیں: عمران خان کی بہنوں کو اڈیالہ جیل جانے سے روک دیا گیا، فیکٹری ناکے پر دھرنا شروع
عمران خان کی بہنوں نے اڈیالہ جیل جانے سے روکنے جانے پر فیکٹری ناکے پر ہی دھرنا دے دیا۔ اور کہا ہے کہ آج وہ واپس نہیں جائیں گی۔
