گوگل نے اعلان کیا ہے کہ وہ اپنا ڈارک ویب رپورٹ ٹول آئندہ سال کے آغاز میں بند کر دے گا، جو صارفین کو اس وقت آگاہ کرتا تھا جب ان کی ذاتی معلومات انٹرنیٹ کے پوشیدہ حصوں میں ہونے والے غیر قانونی ڈیٹا لیکس میں سامنے آتی تھیں۔
گوگل کے مطابق 15 جنوری 2026 کو ڈارک ویب پر نئے ڈیٹا کی اسکیننگ بند کر دی جائے گی، جبکہ 16 فروری 2026 کو یہ فیچر مکمل طور پر ختم کر دیا جائے گا۔ اس کے ساتھ ہی اس سروس سے متعلق تمام صارف ڈیٹا گوگل کے سرورز سے حذف کر دیا جائے گا۔
یہ بھی پڑھیے: گوگل فوٹوز نے ویڈیو ایڈیٹنگ کے جدید فیچر متعارف کروا دیے
ڈارک ویب رپورٹ ٹول پہلی بار مارچ 2023 میں متعارف کرایا گیا تھا، جس کا مقصد صارفین کو ان کے ڈیجیٹل فٹ پرنٹس پر نظر رکھنے میں مدد دینا تھا۔ یہ سروس ای میل ایڈریسز، نام، فون نمبرز اور پتوں جیسی ذاتی معلومات کو رپورٹ شدہ ڈیٹا بریچز اور ڈارک ویب لسٹس میں تلاش کرتی تھی اور مماثلت ملنے پر صارف کو مطلع کرتی تھی۔
صارفین کو بھیجے گئے حالیہ ای میل میں گوگل کا کہنا ہے کہ اگرچہ یہ رپورٹ عمومی معلومات فراہم کرتی تھی، لیکن صارفین کی رائے کے مطابق یہ واضح اور مؤثر حفاظتی اقدامات تجویز نہیں کر پاتی تھی۔
گوگل کے مطابق اب توجہ ایسے ٹولز پر مرکوز کی جا رہی ہے جو صارفین کو آن لائن اپنی معلومات کے تحفظ کے لیے واضح اور قابلِ عمل اقدامات فراہم کریں۔
یہ بھی پڑھیے: اسلام آباد میں سروے اور ای ٹیگز: ہماری معلومات ڈارک ویب پر بک گئیں تو کون ذمہ دار ہوگا؟ سینیٹر پلوشہ خان
گوگل نے واضح کیا ہے کہ اگرچہ ڈارک ویب رپورٹ سروس ختم کی جا رہی ہے، تاہم کمپنی پسِ پردہ صارفین کی معلومات کے تحفظ کے لیے اقدامات جاری رکھے گی۔ اس کے ساتھ صارفین کو سیکیورٹی چیک اپ، پاس کیز، پاس ورڈ مینیجر، ٹو اسٹیپ ویریفکیشن اور گوگل آتھنٹی کیٹر جیسے دیگر حفاظتی ٹولز استعمال کرنے کی ترغیب دی گئی ہے۔ اس کے علاوہ ‘ریزلٹس اباؤٹ یو’ فیچر کا بھی ذکر کیا گیا ہے، جو سرچ رزلٹس میں ذاتی معلومات تلاش کرنے اور بعض صورتوں میں انہیں ہٹانے میں مدد دیتا ہے۔
ڈارک ویب مانیٹرنگ سروس استعمال کرنے والے صارفین کے لیے گوگل نے بتایا ہے کہ سروس کی بندش کے بعد رسائی خود بخود ختم ہو جائے گی۔
