امریکی وزیر دفاع پیٹ ہیگسیتھ نے کہا ہے کہ صدر ڈونلڈ ٹرمپ ایران کے ساتھ معاہدہ چاہتے ہیں، تاہم اگر ایران معاہدے پر راضی نہ ہوا تو جنگ کو مزید شدت سے جاری رکھا جائے گا۔
واشنگٹن میں پریس کانفرنس کرتے ہوئے انہوں نے کہاکہ آنے والے دن ایران کے لیے فیصلہ کن ثابت ہوں گے اور ایرانی حکومت کو پہلے والی حکومت سے زیادہ عقلمند فیصلے کرنے ہوں گے۔
مزید پڑھیں: امریکا اب کسی ملک کی مدد کے لیے موجود نہیں ہوگا، ڈونلڈ ٹرمپ برطانیہ اور فرانس پر برس پڑے
وزیر دفاع نے کہاکہ امریکی فورسز ایران کی اہم صنعتوں اور تحقیقاتی مراکز پر بھرپور حملے کررہی ہیں اور ایرانی فضائی حدود میں جارحانہ کارروائیاں جاری ہیں۔
انہوں نے کہاکہ امریکی فوج نے ایرانی نیوی، فضائیہ اور قیادت کو نشانہ بنایا ہے اور اب تک ایرانی بحریہ کے 150 جہاز تباہ کیے جا چکے ہیں۔
انہوں نے کہاکہ امریکا کے پاس ایران کے مقابلے میں زیادہ آپشنز موجود ہیں، جبکہ ایران کے پاس آپشنز محدود ہیں۔
امریکی وزیر دفاع نے کہاکہ گزشتہ 24 گھنٹوں میں ایران کی جانب سے صرف محدود تعداد میں میزائل داغے گئے۔
انہوں نے کہاکہ ہفتے کے روز انہوں نے مشرق وسطیٰ میں امریکی فوجیوں سے ملاقات کی، ایرانی فوج کو شدید نقصان پہنچ چکا ہے، جس کے باعث ان کی قیادت مایوسی کا شکار ہے۔
انہوں نے مزید کہاکہ اگر ایران معاہدہ نہیں چاہتا تو امریکا مزید سخت کارروائیاں کرے گا، موجودہ ایرانی قیادت کو زیادہ عقلمندی دکھانی ہوگی۔
ایران کی صلاحیتوں کو کمزور کرنے کا سلسلہ جاری ہے، جنرل ڈین کین
اس موقع پر جنرل ڈین کین نے کہا کہ آپریشن اپیک فیوری میں اہداف کامیابی سے حاصل کیے جا رہے ہیں اور ایران کی اہم صنعتی اور تحقیقاتی مراکز پر حملے جاری ہیں۔
مزید پڑھیں: مشرق وسطیٰ کشیدگی، اسحاق ڈار کا چینی ہم منصب سے رابطہ، امن کی بحالی اور استحکام پر اتفاق
انہوں نے دعویٰ کیاکہ امریکی افواج نے ایرانی بحریہ کے 150 جہاز تباہ کر دیے ہیں اور ایران کی صلاحیتوں کو کمزور کرنے کا سلسلہ جاری ہے۔
