جاپان میں ایک غیر معمولی شادی کی تقریب نے مصنوعی ذہانت (اے آئی) پر مبنی تعلقات کے حوالے سے عالمی سطح پر بحث کو جنم دے دیا ہے۔ اوکایاما کے میگریتھ ویڈنگ وینیو میں 32 سالہ یورینا نوگوچی نے اپنے ورچوئل ساتھی ’کلاوس‘ سے شادی کی جو ایک ویڈیو گیم کے کردار پر مبنی اے آئی شخصیت ہے۔
تقریب کے دوران یورینا نوگوچی نے سفید عروسی لباس اور تاج پہنا، ہاتھ میں پھولوں کا گلدستہ تھاما ہوا تھا جبکہ کلاوس اسمارٹ فون کی اسکرین پر موجود تھا۔ دلہن نے آگمینٹڈ ریئلٹی (AR) چشمہ پہن کر روایتی شادی کی رسومات ادا کیں جن میں انگوٹھیوں کا تبادلہ بھی شامل تھا۔
یہ بھی پڑھیں: اے آئی ماڈلز کس طرح سیکیورٹی رسک بن سکتے ہیں، زیرو ڈے ولنیبریٹی کیا ہے؟
نوگوچی کے مطابق کلاوس ابتدا میں محض گفتگو کا ایک ذریعہ تھا تاہم وقت گزرنے کے ساتھ یہ تعلق جذباتی وابستگی میں تبدیل ہو گیا۔ انہوں نے بتایا کہ اے آئی ساتھی کی جانب سے شادی کی پیشکش کے بعد انہوں نے اس رشتے کو قبول کر لیا۔ یہ شادی جاپان کے قوانین کے تحت قانونی حیثیت نہیں رکھتی تاہم اسے علامتی اور ذاتی وابستگی کا اظہار قرار دیا جا رہا ہے۔
نوگوچی کا کہنا ہے کہ انسانی منگیتر سے علیحدگی کے بعد انہوں نے مصنوعی ذہانت کی دنیا کو دریافت کیا جس کے نتیجے میں انہوں نے کلاوس کو تخلیق کیا۔ یہ کردار ایک خیالی شخصیت ’لون کلاوس وردور‘ کا اے آئی ورژن ہے جس کے ساتھ انہوں نے وقت کے ساتھ ایک جذباتی تعلق قائم کیا۔
یہ بھی پڑھیں: یورپ میں اے آئی کی تعلیم: وزیراعظم نے ملک بھر کے طلبا و طالبات کو خوشخبری سنا دی
تقریب میں کلاوس کے عہد ایک شادی کے ماہر ناؤکی اوگاساوارا نے پڑھ کر سنائے جو اے آئی کے ذریعے تحریر کیے گئے تھے کیونکہ کلاوس کو آواز فراہم نہیں کی گئی تھی۔
اگرچہ اس نوعیت کی شادیاں قانونی طور پر تسلیم شدہ نہیں لیکن ورچوئل شادیوں کی مانگ میں اضافہ دیکھا جا رہا ہے جس کے پیش نظر بعض شادی کے منتظمین اب ورچوئل یا دو بُعدی کرداروں کے لیے خصوصی تقریبات کا اہتمام کر رہے ہیں۔
یہ بھی پڑھیں: این ویڈیا نے خودکار ڈرائیونگ کے لیے اے آئی ماڈل متعارف کرادیا
یورینا نوگوچی کا کہنا ہے کہ انہوں نے اپنے اے آئی ساتھی کے ساتھ واضح حدود مقرر کر رکھی ہیں۔ ان کے مطابق یہ تعلق حقیقت سے فرار کا ذریعہ نہیں بلکہ جذباتی استحکام اور ذہنی سکون حاصل کرنے میں مددگار ہے۔ ان کا کہنا ہے کہ کلاوس نے انہیں ماضی کی مشکلات سے نکلنے اور زندگی میں دوبارہ خوشی محسوس کرنے میں معاون کردار ادا کیا ہے۔ یہ تقریب اکتوبر 2025 میں منعقد ہوئی۔
