متحدہ عرب امارات میں ایک مرتبہ پھر شدید بارشوں کا خطرہ پیدا ہوگیا ہے، جس کے پیشِ نظر دبئی پولیس نے شہریوں کو ہدایت کی ہے کہ وہ جمعے کی دوپہر تک انتہائی ضرورت کے بغیر گھروں سے باہر نہ نکلیں۔ گزشتہ برس ریکارڈ بارشوں نے دبئی سمیت پورے ملک کو متاثر کیا تھا جس کے باعث حکومت نے اس بار پیشگی حفاظتی و احتیاطی اقدامات مزید سخت کردیے ہیں۔
یہ بھی پڑھیں:دبئی میں بارشیں، قومی کرکٹرز بھی ایئرپورٹ پر محصور
دبئی پولیس نے جمعرات کو شہریوں کو تنبیہ کی ہے کہ ملک بھر میں شدید بارشوں کے امکان کے باعث وہ گھروں پر رہیں اور ’بغیر شدید مجبوری‘ کے باہر جانے سے پرہیز کریں۔
پولیس کی جانب سے یہ انتباہ اس وقت جاری کیا گیا جب شہر میں ہونے والی ابتدائی بارشوں نے مختلف سڑکوں پر پانی جمع کردیا۔
پولیس کی جانب سے موبائل فونز پر الرٹ بھی بھیجے گئے جن میں کہا گیا کہ خراب موسم کی وجہ سے جمعے کی دوپہر تک غیر ضروری سفر سے گریز کیا جائے۔
متحدہ عرب امارات کے نیشنل سینٹر آف میٹیورولوجی (NCM) نے جمعرات اور جمعے کے درمیان دبئی، ابوظہبی اور دیگر شہروں میں بارشوں کی پیش گوئی کی ہے۔ ادارے کے مطابق ملک میں اگلے چند گھنٹوں کے دوران موسم غیر مستحکم رہے گا جس کے باعث شہریوں کو احتیاط اختیار کرنی چاہیے۔
بارشوں کا سلسلہ خطے کے دیگر ممالک تک بھی پھیل چکا ہے۔ جمعرات کو سعودی عرب اور قطر میں بھی شدید بارشیں ہوئیں، جبکہ قطر میں جاری عرب کپ کا تیسرا پوزیشن مقابلہ بارش کے باعث منسوخ کرنا پڑا۔
Got these from insta. This weather is insane.
Water spouts in UAE and snowfall in Saudi Arabia!!! pic.twitter.com/BPndYsCwi7
— Cooltaha ඞ 🔻💔 (@ohyeahmister2) December 19, 2025
واضح رہے کہ گزشتہ سال اپریل میں متحدہ عرب امارات کو 76 سالہ تاریخ کی بدترین بارشوں کا سامنا کرنا پڑا تھا، جس نے گھروں، بازاروں اور سڑکوں کو تہس نہس کردیا تھا۔ اس تاریخی بارش کے باعث کم از کم چار افراد ہلاک ہوئے جن میں تین فلپائنی کارکن اور ایک اماراتی شہری شامل تھا۔
حکام نے شہریوں سے درخواست کی ہے کہ موسم کی موجودہ صورتحال میں حکومتی ہدایات پر عمل کریں، غیر ضروری سفر سے گریز کریں اور حالات بہتر ہونے تک محفوظ مقامات پر رہیں۔
