پاکستان کے معروف اور سب سے زیادہ سبسکرائبرز رکھنے والے یوٹیوبر ڈکی بھائی نے جیل سے رہائی کے بعد اپنی یوٹیوب آمدن اور چینل تک رسائی کے حوالے سے اہم انکشافات کیے ہیں۔
اپنے حالیہ وی لاگ میں ڈکی بھائی نے بتایا ہے کہ فی الوقت انہیں اپنے یوٹیوب چینل تک مکمل رسائی حاصل نہیں ہے۔ ان کے مطابق چینل پر انہیں صرف ایڈیٹر لیول کی محدود رسائی دی گئی ہے جس کے باعث وہ نہ تو ویڈیوز اپلوڈ یا ڈیلیٹ کر سکتے ہیں اور نہ ہی آمدن سے متعلق کوئی تفصیلات دیکھ سکتے ہیں۔
ڈکی بھائی کا کہنا تھا کہ ان کا ایڈسینس اکاؤنٹ بلاک ہونے کے باعث چینل سے انہیں کسی قسم کی آمدن حاصل نہیں ہو رہی۔ انہوں نے اس تاثر کو بھی مسترد کیا کہ رہائی کے بعد اپلوڈ ہونے والے وی لاگز سے انہیں بہت زیادہ کمائی ہوئی ہے۔ ان کے مطابق موجودہ آمدن صفر ہے اور وہ اس صورتحال کو شدید ناانصافی قرار دیتے ہیں۔
یہ بھی پڑھیں: ڈکی بھائی کی دوران حراست ویڈیو جاری، یوٹیوبر سے کس طرح کے سوال پوچھے جاتے رہے؟
ان کا مزید کہنا تھا کہ ان کا موبائل بھی ان کے پاس نہیں ہے اور اس میں ان کا بہت کانٹینٹ پڑا ہوا ہے اس کے علاوہ ان کے ریسٹورنٹ کا اکاؤنٹ بھی بند ہے اور سارا خرچہ ان کے دوست اور بزنس پارٹنر اریب دیکھ رہے ہیں۔
واضح رہے کہ ڈکی بھائی یوٹیوب پر جلد 10 ملین سبسکرائبرز کا ہدف حاصل کرنے کے قریب ہیں اور حالیہ مہینوں میں بیٹنگ ایپلیکیشنز کی مبینہ تشہیر کے باعث قانونی کارروائی کا سامنا کر چکے ہیں۔
