کراچی کے علاقے لانڈھی میں واقع ایکسپورٹ پروسیسنگ زون (ای پی زیڈ) میں پیر کے روز استعمال شدہ کپڑوں کی ایک فیکٹری میں لگی شدید آگ پر قابو پالیا گیا ہے۔
آج شام فیکٹری میں آگ اچانک بھڑکی اور فیکٹری میں موجود آتش گیر ٹیکسٹائل سامان کے باعث تیزی سے پوری عمارت میں پھیل گئی تھی۔ اطلاعات کے مطابق آگ لگنے کی اطلاع ملتے ہی ریسکیو 1122 اور فائر بریگیڈ کی متعدد گاڑیاں فوری طور پر جائے وقوعہ پر پہنچ گئیں، جہاں آگ پر قابو پانے کے لیے بڑے پیمانے پر آپریشن کیاگیا۔
یہ بھی پڑھیے: انڈیا کے نائٹ کلب میں خوفناک آتشزدگی، غیرملکیوں سمیت 23 افراد ہلاک
آپریشن میں کے ایم سی ، 1122 اور زون کے فائر ٹینڈر اور سنارکل سمیت 13 گاڑیوں نے حصہ لیا۔
فائر فائٹرز بھرپور کوشش کی کہ آگ کو قریبی صنعتی یونٹس تک پھیلنے سے روکا جا سکے۔ عینی شاہدین کے مطابق آگ کے باعث سیاہ دھوئیں کے گھنے بادل فضا میں بلند ہوتے دکھائی دیے، جو کئی کلومیٹر دور سے بھی واضح نظر آئے۔ دھوئیں کے باعث علاقے میں خوف و ہراس پھیل گیا جبکہ ٹریفک کی روانی بھی متاثر ہوئی۔
یہ بھی پڑھیے: ہانگ کانگ میں رہائشی ٹاورز میں خوفناک آتشزدگی، ہلاکتوں کی تعداد 55ہوگئی
ریسکیو حکام کا کہنا ہے کہ تاحال کسی جانی نقصان یا زخمی ہونے کی اطلاع موصول نہیں ہوئی۔ تاہم فیکٹری میں موجود سامان کو نقصان پہنچا۔
ابتدائی طور پر آگ لگنے کی وجہ معلوم نہیں ہو سکی۔
