آزادجموں و کشمیر کے وزیراعظم فیصل ممتاز راٹھور نے قائدِ اعظم محمد علی جناح کے یوم پیدائش کے موقع پر خصوصی پیغام میں کہا ہے کہ قائدِ اعظمؒ نے برصغیر کی تاریخ اور جغرافیہ بدل دیے اور ایک نظریے کو عملی سیاسی حقیقت میں ڈھالا۔ انہوں نے کہا کہ قائدِ اعظمؒ کا عزم، ایمان اور نظم و ضبط آج بھی مشعلِ راہ ہے۔
یہ بھی پڑھیں:اقلیتی برادری کے حقوق کی حفاظت کرینگے، شہباز شریف کا وزیرہاؤس میں منعقدہ تقریب سے خطاب
وزیراعظم آزادکشمیر نے کہا کہ قائدِ اعظمؒ نے کشمیر کو پاکستان کی شہ رگ قرار دیا اور کشمیری عوام ان کے دل کے قریب تھے۔ انہوں نے سرینگر سے کے ایچ خورشید کے انتخاب کو کشمیریوں پر قائدِ اعظمؒ کے اعتماد کی علامت قرار دیا۔
فیصل ممتاز راٹھور نے مزید کہا کہ قائدِ اعظمؒ نے کشمیریوں کے حقِ خودارادیت کی بھرپور حمایت کی اور مسئلہ کشمیر پاکستان کی خارجہ پالیسی کی بنیاد ہے۔ انہوں نے بھارتی ظلم کے سامنے ڈٹ جانے والے کشمیری عوام کو خراجِ تحسین پیش کیا اور کہا کہ کشمیریوں کا نعرہ “ہم پاکستانی ہیں، پاکستان ہمارا ہے” قائد کے فرمان کی عملی تصویر ہے۔
