اسرائیل میں عوام کی بڑی اکثریت اپنی ریاست اور جمہوری نظام سے مایوس دکھائی دیتی ہے۔
ایک حالیہ سروے کے مطابق اسرائیلی شہریوں کا ماننا ہے کہ ملک میں جمہوریت زوال کا شکار ہے جبکہ حکومت اور ریاستی اداروں پر عوامی اعتماد بدستور کم سطح پر موجود ہے۔
یہ سروے اسرائیل ڈیموکریسی انسٹی ٹیوٹ (IDI) نے مئی اور نومبر میں کیا، جس کے نتائج اس ہفتے جاری کیے گئے۔
یہ بھی پڑھیے 96 فیصد اسرائیلیوں کا ماننا ہے کہ نیتن یاہو غزہ میں جنگی مقاصد حاصل کرنے میں ناکام رہے
رپورٹ کے مطابق صرف تقریباً 25 فیصد یہودی اسرائیلیوں نے ملک میں جمہوریت کی صورتحال کو ’اچھی‘ یا ’بہترین‘ قرار دیا۔ ادارے کا کہنا ہے کہ یہ نتائج حالیہ برسوں میں عوامی اعتماد میں مسلسل کمی کے رجحان کی عکاسی کرتے ہیں۔
سروے میں یہ بھی سامنے آیا کہ عرب اسرائیلیوں میں جمہوریت کے بارے میں مثبت رائے ریکارڈ کم سطح 12 فیصد تک گر چکی ہے۔
رپورٹ کے مطابق بیشتر سرکاری اداروں پر اعتماد رکھنے والے افراد کی شرح صرف 10 سے 41 فیصد کے درمیان ہے۔ تاہم یہودی اسرائیلیوں میں اسرائیلی دفاعی افواج (IDF) واحد ادارہ ہے جس پر زیادہ اعتماد کیا جا رہا ہے، جہاں 81 فیصد یہودی شہریوں نے فوج پر اعتماد کا اظہار کیا۔
سروے کے مطابق وزیر اعظم نیتن یاہو کی حکومت پر صرف 25 فیصد یہودی اسرائیلی اور 17 فیصد سے کچھ زائد عرب اسرائیلی اعتماد کرتے ہیں۔ نیتن یاہو اس وقت بھی ایک متنازع شخصیت ہیں اور ان کے خلاف بدعنوانی کے 3مقدمات زیر سماعت ہیں، جن میں وہ تمام الزامات کی تردید کرتے ہیں۔ اکتوبر میں انہوں نے ایک بار پھر وزیر اعظم بننے کی خواہش کا اعلان بھی کیا تھا۔
یہ بھی پڑھیے اسرائیلی معیشت کے تازہ اعدادوشمار توقع سے کہیں زیادہ خوفناک
اعداد و شمار کے مطابق صرف 35 فیصد شہریوں نے کہا کہ وہ مشکل وقت میں ریاست پر بھروسا کر سکتے ہیں۔ اس کے علاوہ 67.5 فیصد یہودی اسرائیلی اور 76 فیصد عرب اسرائیلیوں نے کہا کہ کوئی بھی سیاسی جماعت ایسی نہیں جو ان کے خیالات کی حقیقی نمائندگی کر سکے۔
رپورٹ میں کہا گیا ہے کہ غزہ میں جاری جنگ کے باعث اسرائیل کی عالمی ساکھ کو شدید نقصان پہنچا ہے۔
یہ تنازع اکتوبر 2023 میں حماس کے اسرائیل کے جنوبی علاقوں پر اچانک حملے کے بعد شروع ہوا، جس میں 1,200 افراد ہلاک ہوئے۔ اس کے جواب میں اسرائیل نے غزہ پر شدید بمباری اور زمینی کارروائیاں کیں جو 2برس تک جاری رہیں، اور مقامی صحت حکام کے مطابق 70 ہزار فلسطینی شہید ہوئے۔
