عالمی یومِ آزادیِ صحافت (3 مئی 2026) کے موقع پر صدر مملکت آصف علی زرداری اور وزیراعظم محمد شہباز شریف نے اپنے الگ الگ پیغامات میں صحافت کی اہمیت، صحافیوں کی خدمات اور ذمہ دارانہ میڈیا کے کردار کو عالمی امن، استحکام اور عوامی شعور کے فروغ کے لیے ناگزیر قرار دیا ہے۔
صدر مملکت آصف علی زرداری نے اپنے پیغام میں کہا کہ موجودہ دور میں سچائی پر مبنی، غیر جانبدار اور ذمہ دارانہ صحافت ایک پرامن مستقبل کی تشکیل میں بنیادی حیثیت رکھتی ہے۔ ان کے مطابق صحافی وہ لوگ ہیں جو سچ کو تلاش کرتے، اس کی تصدیق کرتے اور اسے عوام تک پہنچا کر معاشروں میں توازن اور شعور پیدا کرتے ہیں۔
“This year’s theme, “Shaping a Future at Peace,” underscores a fundamental truth that peace cannot be built without truth and in the modern world, truth depends on those who have the courage and integrity to seek it, verify it and bring it to light.” pic.twitter.com/CHqkHkQmRh
— The President of Pakistan (@PresOfPakistan) May 3, 2026
انہوں نے اس سال کے موضوع “پرامن مستقبل کی تشکیل” کو نہایت اہم قرار دیتے ہوئے کہا کہ امن صرف سیاسی یا سفارتی کوششوں سے نہیں بلکہ درست معلومات اور ذمہ دار میڈیا کے ذریعے بھی ممکن ہوتا ہے۔ صدر مملکت نے کہا کہ حکومت آزادی صحافت کے تحفظ اور صحافیوں کے بہتر تحفظ کے لیے اقدامات جاری رکھے گی۔
یہ بھی پڑھیں:صحافت بمقابلہ آرٹیفیشل انٹیلی جنس: کون جیتے گا؟
دوسری جانب وزیراعظم محمد شہباز شریف نے اپنے پیغام میں پاکستان سمیت دنیا بھر کے صحافیوں، رپورٹرز، مدیران اور میڈیا ورکرز کی خدمات کو خراج تحسین پیش کیا۔ انہوں نے کہا کہ مستند اور غیر جانبدار خبریں ایک باخبر اور باشعور معاشرے کی بنیاد ہیں۔
وزیراعظم نے کہا کہ صحافی نہ صرف معلومات کی ترسیل کے ذمہ دار ہیں بلکہ وہ سماجی اقدار کے بھی امین ہیں۔ انہوں نے اس بات پر زور دیا کہ عصر حاضر میں امن و استحکام کے لیے ذمہ دارانہ صحافت اور درست معلومات کا کردار انتہائی اہم ہو چکا ہے۔
وزیراعظم محمد شہباز شریف کا عالمی یومِ آزادیِ صحافت 3 مئی 2026 پر پیغام.
عالمی یومِ آزادیِ صحافت پر میں پاکستان اور دنیا بھر کے صحافی، کالم نویس، رپورٹرز، مدیران، براڈکاسٹنگ اورصحافت سے وابستہ تمام افراد کو انکی بے لوث خدمات پر خراج تحسین پیش کرتا ہوں۔
صحافت سے وابستہ افراد کی… pic.twitter.com/xvNlxO7Jxs
— Prime Minister's Office (@PakPMO) May 3, 2026
انہوں نے کہا کہ پاکستان ایک پرامن ملک ہے جو مکالمے اور مذاکرات کے ذریعے مسائل کے حل پر یقین رکھتا ہے۔ وزیراعظم نے قومی میڈیا کے کردار کو سراہتے ہوئے کہا کہ صحافیوں نے قومی یکجہتی اور غلط معلومات کے تدارک میں اہم کردار ادا کیا ہے۔
انہوں نے ان صحافیوں کو بھی خراج عقیدت پیش کیا جنہوں نے اپنے فرائض کی ادائیگی کے دوران جانوں کا نذرانہ پیش کیا، اور اس عزم کا اعادہ کیا کہ حکومت آزادی صحافت کے فروغ اور تحفظ کے لیے اقدامات جاری رکھے گی۔
دونوں رہنماؤں کے پیغامات میں اس بات پر اتفاق پایا گیا کہ پرامن مستقبل کی بنیاد سچائی، ذمہ داری اور آزاد صحافت پر ہے، اور یہی عناصر عالمی سطح پر بہتر افہام و تفہیم اور استحکام کے ضامن ہیں۔
