متحدہ عرب امارات کے صدر شیخ محمد بن زاید النہیان کل 26 دسمبر کو اپنے پہلے سرکاری دورے پر پاکستان آ رہے ہیں۔ دورے کے دوران اعلیٰ سطحی ملاقاتوں میں دو طرفہ تعلقات، تجارت، سرمایہ کاری اور خطے کی صورتحال پر تبادلۂ خیال کیا جائے گا۔
دورے کی تفصیلات
پاکستانی دفترِ خارجہ کے مطابق متحدہ عرب امارات کے صدر شیخ محمد بن زاید النہیان ایک اعلیٰ سطحی وفد کے ہمراہ پاکستان کا دورہ کریں گے، جس میں وزرا اور سینیئر حکام شامل ہوں گے۔ یہ ان کا صدر بننے کے بعد پاکستان کا پہلا سرکاری دورہ ہوگا۔
🔊PR No.3️⃣8️⃣2️⃣/2️⃣0️⃣2️⃣5️⃣
Curtain Raiser: Visit of the President of the United Arab Emirates to Pakistan, December 26,2025 pic.twitter.com/AlmWtn8nWJ
— Ministry of Foreign Affairs – Pakistan (@ForeignOfficePk) December 24, 2025
وزیراعظم سے ملاقات
یو اے ای کے صدر وزیراعظم شہباز شریف سے ملاقات کریں گے، جس میں دونوں ممالک کے درمیان تعلقات کے تمام پہلوؤں کا جائزہ لیا جائے گا۔ ملاقات میں علاقائی اور عالمی امور پر بھی بات چیت ہوگی۔
تجارت اور سرمایہ کاری پر زور
دفترِ خارجہ کے بیان کے مطابق یہ دورہ تجارت، سرمایہ کاری، توانائی اور ترقیاتی شعبوں میں تعاون کو مزید مضبوط بنانے کا اہم موقع فراہم کرے گا۔ دونوں ممالک خطے میں امن اور استحکام کے لیے مشترکہ کوششوں پر بھی غور کریں گے۔
برادرانہ تعلقات کی عکاسی
دفترِ خارجہ کا کہنا ہے کہ یہ دورہ پاکستان اور متحدہ عرب امارات کے درمیان گہرے اور برادرانہ تعلقات کا مظہر ہے، اور دونوں ممالک باہمی تعاون کو مزید وسعت دینے کے لیے پُرعزم ہیں۔
حالیہ سفارتی روابط
یہ اعلان ایک ایسے وقت میں سامنے آیا ہے جب ایک روز قبل وزیراعظم شہباز شریف نے اسلام آباد میں یو اے ای کے سفیر سالم محمد سالم البواب الزعبی سے ملاقات کی تھی، جس میں تجارت اور سرمایہ کاری بڑھانے پر زور دیا گیا تھا۔
یہ بھی پڑھیں:پاک- یو اے ای وزرائے خارجہ کا ٹیلیفونک رابطہ، علاقائی صورتحال پر تبادلہ خیال
پاکستان اور یو اے ای کے اقتصادی تعلقات
پاکستان متحدہ عرب امارات کو اپنے قریبی اقتصادی اور علاقائی شراکت داروں میں شمار کرتا ہے۔ چین اور امریکا کے بعد یو اے ای پاکستان کا تیسرا بڑا تجارتی شراکت دار ہے۔
سرمایہ کاری اور معاہدے
گزشتہ برسوں میں دونوں ممالک کے درمیان اربوں ڈالر کے معاہدے طے پا چکے ہیں۔ جنوری 2024 میں پاکستان اور یو اے ای نے ریلوے، اقتصادی زونز اور انفراسٹرکچر کے شعبوں میں 3 ارب ڈالر سے زائد کے معاہدوں پر دستخط کیے تھے۔
یو اے ای کی پاکستان میں سرمایہ کاری
یو اے ای گزشتہ 2 دہائیوں کے دوران پاکستان میں 10 ارب ڈالر سے زائد کی سرمایہ کاری کر چکا ہے، جس سے دونوں ممالک کے مضبوط اقتصادی تعلقات کا اندازہ لگایا جا سکتا ہے۔
