وزیر مملکت برائے قانون بیرسٹر عقیل ملک نے کہا ہے کہ پی ٹی آئی سوشل میڈیا پر جھوٹے فالوورز اور مصنوعی ریچ کے ذریعے اپنی سیاسی ناکامیوں کو چھپانے کی کوشش کر رہی ہے۔ انہوں نے واضح کیا کہ عوام حقیقت سے آگاہ ہیں اور یہ مقبولیت کے دعوے محض فریب پر مبنی ہیں۔
یہ بھی پڑھیں:فیض حمید اور عمران خان کا گٹھ جوڑ سامنے آچکا، بیرسٹر عقیل
اسلام آباد میں میڈیا سے گفتگو کرتے ہوئے بیرسٹر عقیل ملک نے کہا کہ پی ٹی آئی کی سوشل میڈیا پر مقبولیت کا پردہ چاک ہو چکا ہے۔ ان کا کہنا تھا کہ پارٹی سیاسی میدان میں اپنی ناکامیاں چھپانے کے لیے سوشل میڈیا کا سہارا لیتی ہے اور مصنوعی انداز میں اپنی طاقت دکھاتی ہے۔
انہوں نے مزید کہا کہ پی ٹی آئی کی سیاست منفی بیانیے اور جھوٹ پر مبنی ہے، جبکہ عوام حقیقت کو بخوبی جانتے ہیں۔ ان کے مطابق، سوشل میڈیا پر پی ٹی آئی کے حقیقی فالوورز موجود نہیں ہیں اور یہ محض فریب پر مبنی مقبولیت کے دعوے ہیں۔
بیرسٹر عقیل ملک نے الزام عائد کیا کہ بھارتی پراپیگنڈا اکاؤنٹس پی ٹی آئی کے سوشل میڈیا اکاؤنٹس کی پیروی کرتے ہیں اور پارٹی کی مصنوعی مقبولیت کو فروغ دیتے ہیں۔ وزیر مملکت قانون نے کہا کہ اب پی ٹی آئی کی حقیقتیں عوام کے سامنے آشکار ہو چکی ہیں اور جھوٹے دعوے عوامی اعتماد کو متاثر نہیں کر سکتے۔
