پاکستان اور مراکش نے دفاعی تعاون کو مستقل بنیادوں پر استوار کرنے اور فوجی تربیت کے شعبے میں اشتراک بڑھانے پر اتفاق کیا ہے۔ وفاقی وزیر دفاع خواجہ آصف نے کہا ہے کہ دونوں ممالک ایک ادارہ جاتی دفاعی فریم ورک قائم کریں گے جو مستقبل میں مشترکہ دفاعی تعاون کی راہ ہموار کرے گا۔
وزیر دفاع خواجہ آصف کا دورۂ مراکش
خواجہ آصف 12 سے 14 جنوری تک 2 روزہ سرکاری دورے پر مراکش میں موجود ہیں، جہاں وہ مراکش کے وزیر مملکت برائے قومی دفاعی انتظامیہ عبداللطیف لوداعی سے ملاقاتیں کر رہے ہیں۔ یہ دورہ ایسے وقت میں ہو رہا ہے جب گزشتہ سال بھارت کے ساتھ مختصر تنازع کے بعد متعدد مسلم ممالک نے پاکستان کے ساتھ دفاعی معاہدوں میں دلچسپی ظاہر کی ہے۔
مزید پڑھیں: وزیر دفاع کا دورہ مراکش: دونوں ملکوں کے درمیان دفاعی تعاون کے لیے مفاہمتی یادداشت پر دستخط
دفاعی تعاون کے لیے مفاہمتی یادداشت متوقع
وزیر دفاع کے مطابق ان کے دورے کے دوران پاکستان اور مراکش کے درمیان دفاعی تعاون کے فروغ کے لیے مفاہمتی یادداشت (MoU) پر دستخط کیے جانے کی توقع ہے۔ خواجہ آصف نے سوشل میڈیا پر جاری بیان میں کہا کہ اس معاہدے کے تحت دونوں ممالک کے درمیان مستقل دفاعی روابط کے لیے ایک ادارہ جاتی ڈھانچہ قائم کیا جائے گا۔
View this post on Instagram
فوجی تربیت اور تجربات کے تبادلے پر اتفاق
خواجہ آصف کے مطابق اس مفاہمتی یادداشت کے ذریعے فوجی تربیت، تجربات کے تبادلے، استعداد کار میں اضافے، اور دیگر مشترکہ دفاعی اقدامات کے لیے نئے مواقع پیدا ہوں گے۔ انہوں نے بتایا کہ وہ مراکش میں وفود کی سطح پر مذاکرات کی بھی قیادت کریں گے جن میں باہمی دلچسپی کے مختلف شعبوں میں تعاون بڑھانے پر بات چیت ہوگی۔
پاکستان اور مراکش کے دیرینہ تعلقات
پاکستان اور مراکش کے درمیان دوستانہ اور مضبوط تعلقات قائم ہیں، جن میں سفارتی، دفاعی اور اقتصادی روابط شامل ہیں۔ دونوں ممالک کے تعلقات کو اعلیٰ سطحی دوروں اور دوطرفہ معاہدوں کے ذریعے مزید تقویت ملتی رہی ہے۔
مشترکہ فوجی مشقیں اور فضائی تعاون
گزشتہ سال اپریل میں پاکستان اور مراکش کی افواج نے مشترکہ دوطرفہ فوجی مشقوں کے تیسرے مرحلے کا آغاز کیا تھا، جس کا مقصد فوجیوں کی پیشہ ورانہ صلاحیتوں میں اضافہ اور دفاعی تعلقات کو مضبوط بنانا تھا۔
یہ بھی پڑھیے جنگ آزمودہ جے ایف 17 تھنڈر: پاکستان کی دفاعی برآمدات میں بڑی پیشرفت، کون سے ممالک خریدار اور کون منتظر؟
اسی طرح نومبر 2024 میں مراکش کی فضائیہ کے انسپکٹر میجر جنرل محمد گادیہ نے پاکستان کے چیف آف ایئر اسٹاف ایئر چیف مارشل ظہیر احمد بابر سدھو سے ملاقات کی تھی، جس میں ایرو اسپیس کے شعبے میں تعاون میں دلچسپی کا اظہار کیا گیا تھا۔
