بھارتی شہر بنگلورو کے کیمپی گوڑا انٹرنیشنل ایئرپورٹ پر ایک افسوسناک واقعہ سامنے آیا ہے جہاں ایک کوریائی خاتون مسافر نے گراؤنڈ اسٹاف کے اہلکار پر جنسی زیادتی کا الزام عائد کیا ہے۔ یہ واقعہ پیر 19 جنوری کو پیش آیا۔
پولیس کے مطابق ملزم کی شناخت عفان کے نام سے ہوئی ہے، جو ایئر انڈیا سیٹس (Air India SATS) میں بطور گراؤنڈ اسٹاف کام کرتا تھا۔ یہ کمپنی ایئرپورٹ پر گراؤنڈ اور کارگو سروسز فراہم کرتی ہے۔
یہ بھی پڑھیے بھارت، قومی شوٹنگ کوچ پر کم عمر کھلاڑی سے جنسی زیادتی کا الزام
خاتون نے پولیس کو دی گئی شکایت میں بتایا کہ وہ کوریا جانے والی پرواز کے لیے امیگریشن کلیئرنس مکمل کر کے ٹرمینل کی جانب جا رہی تھی کہ اس دوران ایک مرد اہلکار نے اسے روکا اور ٹکٹ دکھانے کو کہا۔
ملزم نے دعویٰ کیا کہ اس کے چیک اِن سامان میں مسئلہ ہے اور اس سے بیپ کی آواز آئی ہے۔ اس نے خاتون کو یہ کہہ کر خوفزدہ کیا کہ اگر وہ دوبارہ عام اسکریننگ کاؤنٹر پر گئی تو وقت لگے گا اور فلائٹ چھوٹ سکتی ہے۔
الگ تلاشی کے بہانے زیادتی
ملزم نے خاتون کو الگ تلاشی کے بہانے مردوں کے واش روم کے قریب لے جا کر مبینہ طور پر نامناسب انداز میں ہاتھ لگایا۔ خاتون کے مطابق اس نے احتجاج کیا اور مزاحمت کی، مگر اس کے باوجود ملزم نے اسے گلے لگا لیا، تھینک یو کہا اور وہاں سے چلا گیا۔
یہ بھی پڑھیں:’بھیا مت کرو‘، بھارت میں موٹرسائیکل رائیڈر جنسی بھیڑیے بن گئے
خاتون نے واقعے کے فوراً بعد ایئرپورٹ سیکیورٹی کو اطلاع دی، جس پر اہلکاروں نے ملزم کو حراست میں لے کر پولیس کے حوالے کر دیا۔
سی سی ٹی وی فوٹیج نے الزام کی تصدیق کر دی
پولیس نے ایئرپورٹ کی سی سی ٹی وی فوٹیج کا جائزہ لیا، جس میں ملزم کا قابلِ اعتراض رویہ واضح طور پر دیکھا جا سکتا ہے۔ شواہد کی بنیاد پر پولیس نے مقدمہ درج کر کے محمد افان کو گرفتار کر لیا۔
ایئرپورٹ پولیس کا کہنا ہے کہ واقعے کی مزید تفتیش جاری ہے اور تمام قانونی پہلوؤں کا باریک بینی سے جائزہ لیا جا رہا ہے۔
