صدر مملکت ڈاکٹر عارف علوی نے یوم تکبیر کے موقع پر پاکستانی قوم کو مبارکباد پیش کرتے ہوئے کہا ہے کہ اس دن پوری قوم اپنے نامور انجینئرز، سائنسدانوں اور سیاسی و عسکری قیادت کو خراج تحسین پیش کرتی ہے۔
صدر مملکت نے یوم تکبیر کے موقع پر اپنے پیغام میں کہا کہ ’آج کے دن 25 سال قبل بھارت کے ایٹمی دھماکوں کے جواب میں پاکستان نے ایٹمی تجربات کیے جو خطے میں طاقت کے توازن کو برقرار رکھنے کے لیے ناگزیر تھے۔ جوہری صلاحیت کا حصول واقعی ایک قابل ذکر کارنامہ تھا جس کے لیے ہمارے سائنسدان، انجینئرز، وقت کی سیاسی اور عسکری قیادت قابل تحسین ہے‘۔
Message from President Dr. Arif Alvi on the occasion of Youm-e-Takbeer. pic.twitter.com/29OZVoNeP9
— The President of Pakistan (@PresOfPakistan) May 28, 2023
صدر مملکت نے مزید کہا کہ پاکستانی سائنسدانوں اور انجینئرز نے مختصر عرصے میں پاکستان کو ایٹمی قوت بنایا، ہمیں اپنی سیاسی اور عسکری قیادت کو سراہنا چاہیے جس نے ملکی دفاع کو ناقابل تسخیر بناتے ہوئے ایٹمی صلاحیت کے حصول کے لیے اس وقت ایک دانشمندانہ فیصلہ کیا، پوری قوم ان تمام لوگوں کی ممنون ہے جنہوں نے پاکستان کو پہلی اسلامی ایٹمی طاقت بنانے میں اپنا کردار ادا کیا۔
صدر علوی کا کہنا تھا ’آئیے ہم اپنے لوگوں کی فکری ترقی میں سرمایہ کاری کرنے، اپنے دفاع کو یقینی بنانے کے لیے سائبر سیکیورٹی کو مضبوط بنا کر پاکستان کو ایک محفوظ ملک بنانے کا عہد کریں، کہا مجھے امید ہے کہ ہم اپنی اجتماعی کوششوں سے پاکستان کے دفاع کو ناقابل تسخیر بنانے میں کامیاب ہو جائیں گے۔
یوم تکبیر: ایٹمی دھماکوں کے 25 برس مکمل، وزیراعظم اور آئی ایس پی آر کی مبارکباد
پاکستان کے ایٹمی دھماکوں کے 25 برس مکمل ہوگئے، آج ہی کے دن 28 مئی 1998 کو پاکستان نے خطے میں طاقت کا توازن بحال کیا تھا۔ وزیراعظم پاکستان شہباز شریف اور پاک فوج کے شعبہ تعلقات عامہ نے قوم کو مبارک پیش کی ہے۔
وزیراعظم شہباز شریف نے یوم تکبیر پر قوم کو مبارکباد پیش کرتے ہوئے کہا ہے کہ 28 مئی کو بین الاقوامی دباؤ، دھمکیوں اور لالچ کو خاطر میں نہ لاتے ہوئے وطن کی قیادت نے، اپوزیشن اور قوم کی تائید و حمایت سے ناممکن کو ممکن کر دکھایا۔ اسی اتحاد ، عزم، توجہ اور تسلسل کا مظاہرہ کرکے اب ہمیں پاکستان کو معاشی قوت بنانا ہے، آج کی دنیا میں ہدف معیشت ہے۔ معاشی کمزوری دور کرنا آج کا ایٹمی پروگرام ہے۔
ترجمان وزیراعظم آفس سے جاری اعلامیے کے مطابق وزیراعظم نے کہا کہ آج سے 25 سال قبل آج ہی کے دن اہل پاکستان نے بھارت کے ایٹمی دھماکوں کے جواب میں 5 جوہری دھماکے کرکے اپنے دفاع کے ناقابل تسخیر ہونے کا اعلان کیا تھا۔ یہ دن ہمارے اس ازلی و ابدی عزم کا اظہار تھا کہ ہم آزاد ہیں اور آزاد ہی رہیں گے، کوئی ہماری آزادی چھین نہیں سکتا۔ ہماری آزادی، خود مختاری، قومی وقار اور دفاع ہمیں ہر چیز سے پیارا ہے۔
انہوں نے کہا کہ آج میں اس وقت کے وزیراعظم اور میرے قائد محمد نواز شریف کو سلام پیش کرتا ہوں جنہوں نے صرف اللہ تعالیٰ کی طاقت پر بھروسہ کرتے ہوئے کسی سُپر پاور کی دھمکیوں کی پرواہ کی اور نہ ہی اربوں ڈالر کی لالچ ہی انہیں ان کے آہنی عزم و ارادے سے ہٹا سکی۔ نواز شریف نے ملکی دفاع ناقابل تسخیر بناکر پاکستان کو اسلامی دنیا کی پہلی اور دنیا کی ساتویں ایٹمی قوت بنایا۔
Today, the complete Pakistani nation celebrates the Silver Jubilee of Youm-e-Takbeer and commemorates the remarkable achievement of establishing Credible Minimum Deterrence. This achievement has reshaped the power dynamics in our region.
1/2— DG ISPR (@OfficialDGISPR) May 27, 2023
پاک فوج سائنس دانوں اور انجینئرز کو سلام پیش کرتی ہے: آئی ایس پی آر
یوم تکبیر کے موقع پر آئی ایس پی آر کی جانب سے جاری بیان میں کہا گیا ہے کہ قوم آج یوم تکبیر کی سلور جوبلی منارہی ہے، پاکستان کی اس کامیابی نے خطے میں طاقت کے توازن کو نئی شکل دی۔
Armed Forces pay rich tribute to the brilliant minds who conceived and achieved this accomplishment under daunting challenges. We salute the scientists and engineers who turned the impossible into a reality. Long Live Pakistan. *#YoumeTakbeer
2/2— DG ISPR (@OfficialDGISPR) May 27, 2023
اپنے بیان میں آئی ایس پی آر کا کہنا تھا کہ بہترین ذہنوں نے مشکل چیلنجز کے باوجود کارنامہ سرانجام دیا، مسلح فوج ان افراد کو خراج تحسین پیش کرتی ہے۔
آئی ایس پی آر کا مزید کہنا تھا کہ پاک فوج سائنس دانوں اور انجینئرز کو سلام پیش کرتی ہے، یہ وطن ہمیشہ قائم رہے گا، پاکستان زندہ باد۔
یوم تکبر: 28 مئی 1998
یوم تکبیر پاکستان کی تاریخ کا ایک اہم دن ہے جب بھارت کی جانب سے ایٹمی دھماکوں کے جواب میں 28 مئی 1998ء کو پاکستان نے صوبہ بلوچستان کے ضلع چاغی کے مقام پر 5 کامیاب ایٹمی دھماکے کیے۔ اس دن کو یوم تکبیر کے نام سے موسوم کیا گیا تھا۔
پاکستان اٹامک انرجی کمیشن (پی اے ای سی) کے مطابق 28 مئی کو کیے گئے ٹیسٹوں سے ریکٹر اسکیل پر زلزلے کے 5.0 سگنل پیدا ہوئے، جس کی مجموعی پیداوار 40 KT تک ہے۔
یہ جوہری تجربہ بلوچستان کے ضلع چاغی کے راس کوہ پہاڑیوں میں کیا گیا۔ چاغی اول پاکستان کا ایٹمی ہتھیاروں کا پہلا تجربہ تھا۔ یہ 11 اور 13 مئی 1998ء کو ہندوستان کے دوسرے جوہری تجربوں کا اسٹریٹجک جواب تھا۔
