گورنر پنجاب بلیغ الرحمان نے الیکشن کمیشن اور اسپیکر پنجاب اسمبلی کو جوابی خطوط لکھ دیئے۔ پنجاب اسمبلی کے عام انتخابات کے حوالے سے کوئی تاریخ دیئے بغیر انہوں نے اپنے اس عمل کی آئینی وضاحت پیش کی ہے۔
سیکریٹری الیکشن کمیشن کو لکھے خط میں گورنر پنجاب کا موقف ہے کہ پنجاب اسمبلی آئین کے آرٹیکل 112 کی شق 3 کے تحت تحلیل ہوئی ہے نہ کہ آرٹیکل 105 کی شق ۔3 کی بنیاد پر ۔ کم و بیش اسی موقف کے ساتھ انہوں نے اسپیکر پنجاب اسمبلی سبطین خان کو بھی جوابی خط لکھا ہے
آئین کے آرٹیکل 112 کی شق 3 کے مطابق وزیر اعلٰی کے مشورے پر صوبائی اسمبلی اڑتالیس گھنٹے میں خود بخود تحلیل ہوجائے گی جبکہ آ رٹیکل 105 کی شق 3 کے مطابق افر گورنر صوبائی اسمبلی وزیراعلٰی یا صوبائی کابینہ کے مشورے کے بغیر تحلیل کرتا ہے تو اسے نوے روز میں عام انتخابات کی تاریخ دینا ہوگی۔
گورنر پنجاب بلیغ الرحمان کی جانب سے لکھے خط میں الیکشن کمیشن کو ملک کی موجودہ سیکیورٹی اور اقتصادی صورت حال کو مدنظر رکھتے ہوئے تمام اسٹیک ہولڈر سے مشاورت کے ساتھ صوبے میں عام انتخابات کے حوالے سے پیش رفت کا مشورہ دیا گیا ہے۔
