صدر مملکت آصف علی زرداری نے آئینِ پاکستان کے تحت حاصل اختیارات استعمال کرتے ہوئے لاہور ہائیکورٹ سے متعلق اہم فیصلے کیے ہیں۔
وزارت قانون کی جانب سے جاری کردہ ایک نوٹیفکیشن کے ذریعے صدرِ مملکت نے آئین کے آرٹیکل 193 کے تحت لاہور ہائیکورٹ کے 11 ایڈیشنل ججز کو مستقل جج تعینات کرنے کی منظوری دے دی ہے۔
ان ججز کی تعیناتی ان کے عہدوں کا حلف اٹھانے کی تاریخ سے مؤثر ہوگی۔
یہ بھی پڑھیں: لاہور ہائیکورٹ میں مزید ججز کی تقرری، ایک ایڈیشنل جج کی مدت میں توسیع کا نوٹیفکیشن جاری
مستقل جج تعینات کیے جانے والوں میں جسٹس حسن نواز مخدوم، جسٹس ملک وقار حیدر اعوان، جسٹس سردار اکبر علی اور جسٹس سید احسن رضا کاظمی شامل ہیں۔
ان کے علاوہ جسٹس ملک جاوید اقبال وینس، جسٹس محمد جواد ظفر، جسٹس خالد اسحاق، جسٹس ملک محمد اویس خالد، جسٹس چوہدری سلطان محمود، جسٹس تنویر احمد شیخ اور جسٹس عبہر گل خان کو بھی مستقل کیاگیا ہے۔
مزید پڑھیں: چیف جسٹس لاہور ہائیکورٹ سمیت 2 ججز کیخلاف سپریم جوڈیشل کونسل میں شکایت دائر
دوسری جانب ایک علیحدہ نوٹیفکیشن کے مطابق صدرِ مملکت نے آئین کے آرٹیکل 197 کے تحت لاہور ہائیکورٹ کے ایڈیشنل جج جسٹس طارق محمود باجوہ کی مدتِ ملازمت میں 6 ماہ کی توسیع کی منظوری دے دی ہے۔
اس توسیع کا اطلاق ان کی موجودہ مدت ختم ہونے کی تاریخ سے مؤثر ہوگی۔
ان فیصلوں کو لاہور ہائیکورٹ میں عدالتی امور کو مؤثر بنانے اور مقدمات کے بروقت فیصلوں کے لیے ایک اہم پیش رفت قرار دیا جا رہا ہے۔
