پرانے لاہور کی اصل روح کو محسوس کرنے کے لیے اندرونِ لاہور میں واقع صادقین بیٹھک ایک منفرد اور دلکش مقام کے طور پر ابھر کر سامنے آئی ہے۔ یہ بیٹھک دہلی گیٹ کے قریب، گلی سرجن سنگھ میں واقع ہے، جہاں مغل دور کے شاندار فنِ تعمیر کی جھلک اور ماضی کی تہذیب کو قریب سے دیکھا جا سکتا ہے۔
مزید پڑھیں: مصور صفدر علی کی ’گم شدہ‘ پینٹنگز کی یوٹیوب پر ڈرامائی بازیافت
صادقین بیٹھک کے بانی ذیشان حیدر ہیں، جنہوں نے لندن سے واپسی پر نامور مصور اور خطاط صادقین کو خراجِ تحسین پیش کرنے کے لیے اس ثقافتی مرکز کی بنیاد رکھی۔ ذیشان حیدر کے مطابق صادقین نے کبھی اپنی کوئی پینٹنگ فروخت نہیں کی، بلکہ فن کو روحانی اور فکری اظہار کا ذریعہ بنایا۔
یہ بیٹھک صادقین کے نام سے منسوب فن پاروں اور پینٹنگز کی نمائش کے لیے بھی مخصوص ہے، جو دیکھنے والوں کو فن کی گہرائی اور تخلیقی وسعت سے روشناس کراتے ہیں۔
صادقین بیٹھک کو ایک جامع ثقافتی مرکز کے طور پر بھی پیش کیا گیا ہے، جہاں نمائشیں، خطاطی کے پروگرام، فلم اسکریننگ، فوٹوگرافی، کتابوں کی رونمائی، شعری محفلیں اور دیگر ادبی و ثقافتی تقریبات منعقد کی جاتی ہیں۔ یہ پلیٹ فارم فنونِ لطیفہ کے فروغ اور تخلیقی سرگرمیوں کی حوصلہ افزائی کے لیے بہترین جگہ فراہم کرتا ہے۔
مزید پڑھیں: حمید اختر کی ‘کال کوٹھری’ اور آج کا پاکستان
اس کے علاوہ، صادقین بیٹھک شادیوں، سالگرہوں اور دیگر نجی تقریبات کے لیے بھی ایک خوبصورت، پُرسکون اور باوقار مقام فراہم کرتی ہے، جہاں ماضی کی تہذیب اور فن کی خوشبو آج بھی محسوس کی جا سکتی ہے۔
