لاہور میں پاکستان مسلم لیگ (ن) کے صدر محمد نواز شریف اور وزیراعلیٰ پنجاب مریم نواز شریف سے برطانیہ کی ہائی کمشنر جین میریٹ نے ملاقات کی۔
ملاقات کے دوران باہمی دلچسپی کے امور، دوطرفہ تعلقات اور علاقائی صورتحال پر تبادلہ خیال کیا گیا۔ دونوں جانب سے پاکستان اور برطانیہ کے درمیان تعاون کو مزید مضبوط بنانے کے عزم کا اظہار کیا گیا۔
یہ بھی پڑھیے: غیرملکی سفارتکار بھی بسنت میں شریک، فیسٹیول کے رنگ برطانوی ہائی کمشنر جین میریٹ کو لاہور کھینچ لائے
برٹش ہائی کمشنر جین میریٹ نے اس موقع پر محمد نواز شریف کی پاکستان کے لیے خدمات کو سراہتے ہوئے انہیں گرانقدر قرار دیا۔ انہوں نے وزیراعلیٰ پنجاب مریم نواز شریف کے جاری ترقیاتی منصوبوں کو بھی قابل تحسین قرار دیا اور پنجاب میں مختلف شعبوں میں اصلاحاتی اقدامات کی تعریف کی۔
جین میریٹ نے لاہور میں بسنت کے تہوار کے انعقاد پر خوشی کا اظہار کرتے ہوئے کہا کہ یہ ثقافتی سرگرمیاں شہر کی مثبت شناخت کو اجاگر کرتی ہیں۔
ملاقات خوشگوار ماحول میں ہوئی جس میں پاک برطانیہ تعلقات کے فروغ اور مستقبل میں تعاون کے امکانات پر بھی گفتگو کی گئی۔
