سعودی وفد اور پاکستان ریجنل اکنامک فورم کے درمیان اہم ملاقات، زرعی شعبے میں سرمایہ کاری کے مواقع پر تفصیلی غور

سعودی عرب کی وزارت سرمایہ کاری کے ایک اعلیٰ سطحی وفد نے پاکستان ریجنل اکنامک فورم کے ساتھ اجلاس منعقد کیا جس میں پاکستان کے زرعی شعبے میں ممکنہ سرمایہ کاری کے مواقع پر تفصیلی غور کیا گیا۔

یہ بھی پڑھیں: پاکستان اورسعودی عرب کا سیکیورٹی و انسدادِ دہشت گردی تعاون بڑھانے پر اتفاق

سعودی وفد میں نادک، لین الخیر اور الرشید ہولڈنگ کے نمائندگان شامل تھے۔ اجلاس میں سفارت خانۂ پاکستان، ریاض کی وزیر برائے تجارت و سرمایہ کاری ڈاکٹر شگفتہ زرین اور سعودی وزارتِ سرمایہ کاری کے نمائندے مشاری الہدیب بھی شریک تھے۔

ملاقات کے دوران زرعی اور ایگری بزنس کے شعبوں میں سعودی سرمایہ کاری کے امکانات، تکنیکی تعاون، ویلیو چین ڈویلپمنٹ اور باہمی شراکت داری کے فروغ پر تفصیلی تبادلہ خیال کیا گیا۔

فریقین نے زرعی پیداوار، فوڈ سیکیورٹی اور جدید زرعی ٹیکنالوجی کے شعبوں میں اشتراک عمل کو وسعت دینے پر اتفاق کیا۔

مزید پڑھیے: سعودی عرب میں ابھرتی معیشتوں کی العلا کانفرنس 2026 کا آغاز، عالمی اقتصادی چیلنجز پر غور

پاکستان ریجنل اکنامک فورم کی نمائندگی چیئرمین و سابق وفاقی وزیر برائے سرمایہ کاری ہارون شریف، سابق وزیر سی پیک و سینئر فیلو خالد منصور اور ریٹائرڈ وائس ایڈمرل ہاشم خان (سابق نائب سربراہ پاک بحریہ و سابق سفیر پاکستان برائے سعودی عرب) نے کی۔

مزید پڑھیں: سعودی عرب امریکا کے بعد بوئنگ کا بڑا شراکت دار، عالمی دفاعی نمائش میں انکشاف

ملاقات کو دونوں برادر ممالک کے درمیان بڑھتے ہوئے اقتصادی تعاون کا مظہر قرار دیا گیا جبکہ زرعی شعبے کو اسٹریٹجک شراکت داری اور پائیدار سرمایہ کاری کے لیے ایک اہم میدان قرار دیا گیا۔