کولمبو میں ہونے والا اتوار کا ہائی پروفائل پاک بھارت مقابلہ محض ایک کرکٹ میچ نہیں بلکہ ایشیائی کرکٹ بورڈز کو ایک دوسرے کے قریب کرنے کا اہم موقع بھی بننے جا رہا ہے۔ آئی سی سی ٹی 20 ورلڈ کپ 2026 کے دوران ہونے والے اس مقابلے میں ایشیا کی 5 بڑے کرکٹ بورڈز کی اعلیٰ قیادت کی غیر رسمی مگر اہم ملاقات متوقع ہے۔
یہ بھی پڑھیں: ’اصل مسئلہ آئی سی سی اور بی سی سی آئی ہے‘، ہاکی میچ میں پاک بھارت کھلاڑیوں کے ہاتھ ملانے پر لوگوں کا خیر مقدم
بھارتی میڈیا رپورٹس کے مطابق کرکٹ کی عالمی باڈی آئی سی سی کے چیئرمین جے شاہ کولمبو پہنچیں گے جہاں ان کی موجودگی میں بھارت، پاکستان اور بنگلہ دیش کے کرکٹ حکام کے درمیان اہم بات چیت کا امکان ہے۔ ان مذاکرات میں بنگلہ دیش کرکٹ بورڈ کے سربراہ امین الاسلام بلبل بھی شریک ہوں گے۔
میڈیا رپورٹ کے مطابق امین الاسلام نے کولمبو میں اپنی موجودگی کی تصدیق کرتے ہوئے کہا کہ وہ پاک بھارت میچ دیکھنے کے ساتھ ساتھ حالیہ ہفتوں میں پیدا ہونے والی کشیدگی کے بعد بھارتی کرکٹ بورڈ (بی سی سی آئی) سے تعلقات میں بہتری کے لیے کوشش کریں گے۔
انہوں نے یہ بھی واضح کیا کہ انہیں اس اہم میچ میں شرکت کی دعوت براہ راست آئی سی سی کی جانب سے دی گئی۔
ان کے مطابق آئی سی سی چاہتی ہے کہ ایشیا کی 5 بڑی کرکٹ طاقتیں ایک ساتھ بیٹھ کر نہ صرف میچ دیکھیں بلکہ باہمی امور پر بھی تبادلہ خیال کریں۔
مزید پڑھیے: بھارتی ہٹ دھرمی برقرار، بی سی سی آئی کا ایشیا کپ نہ کھیلنے کا فیصلہ
امین الاسلام کے مطابق آئی سی سی نے فیصلہ کیا ہے کہ 15 تاریخ کو ہونے والے پاک بھارت ورلڈ کپ میچ میں ایشیا کے پانچوں بڑے اسٹیک ہولڈرز کے نمائندے ایک ساتھ موجود ہوں، میچ دیکھیں اور باہمی بات چیت کریں۔
مزید پڑھیں: بی جے پی کا بی سی سی آئی کو حکومت کے ماتحت کرنے کا فیصلہ، اس سے کیا فرق پڑے گا؟
اس حکمت عملی کا مقصد حالیہ انتظامی تناؤ کو کم کرنا اور خطے میں کرکٹ کے تعلقات کو مستحکم بنانا ہے۔ آئی سی سی کو امید ہے کہ کرکٹ کے اس بڑے مقابلے کو سفارتی موقع میں بدل کر ایشیائی کرکٹ میں تعاون اور ہم آہنگی کا نیا باب کھولا جا سکے گا۔
