وزیراعظم پاکستان کے مشیر برائے سیاسی امور سینیٹر رانا ثنااللہ نے کہا ہے کہ پی ٹی آئی ملک میں افراتفری اور انتشار پھیلانا چاہتی ہے، یہ جو کچھ کررہے ہیں اس کا عمران خان کے علاج سے کوئی تعلق نہیں۔
نجی ٹی وی سے گفتگو کرتے ہوئے انہوں نے کہاکہ سابق وزیراعظم عمران خان کو بہترین طبی سہولیات فراہم کی گئی ہیں اور ان کے علاج میں کوئی کمی نہیں ہوئی۔
انہوں نے پی ٹی آئی کی حالیہ احتجاجی سرگرمیوں پر تشویش کا اظہار کرتے ہوئے کہاکہ یہ لوگ ملک میں افراتفری اور انتشار پھیلانا چاہتے ہیں اور کبھی بھی مطمئن نہیں ہوں گے۔
رانا ثنا اللہ نے سوال کیاکہ آج کی ملاقات کے بعد یہ جو پیغام باہر لے کر آئے ہیں، کیا جیل کا قانون اس کی اجازت دیتا ہے؟
انہوں نے واضح کیاکہ کسی بھی صوبے کے آئی جی اور چیف سیکریٹری ہائیکورٹ کے احکامات پر عملدرآمد کے پابند ہیں۔
انہوں نے مزید کہاکہ خیبرپختونخوا کے عوام میں راستوں کی بندش پر غم و غصہ پایا جاتا ہے اور ایک صوبائی حکومت کو اجازت نہیں کہ وہ عوامی راستے بند کرے۔
مزید پڑھیں: تحریک تحفظ آئین کا پارلیمنٹ میں دھرنا جاری، عمران خان کی صحت کے پیش نظر حکومت سے اہم مطالبات کردیے
رانا ثنااللہ نے کہا کہ پی ٹی آئی جو کر رہی ہے وہ صرف سیاست ہے اور اس کا عمران خان کے علاج سے کوئی تعلق نہیں، بلکہ ان کا فوکس ملک میں انارکی اور انتشار پھیلانے پر ہے۔
