سیکیورٹیز اینڈ ایکسچینج کمیشن آف پاکستان نے پاکستان میں غیر ملکی کمپنیوں کے بڑے پیمانے پر اخراج کے دعووں کو مسترد کرتے ہوئے وضاحت کی ہے کہ 2022 سے 2025 کے درمیان صرف 19 غیر ملکی کمپنیوں نے اپنی سرگرمیاں بند کیں، جبکہ اسی مدت میں 79 نئی غیر ملکی کمپنیاں رجسٹرڈ ہوئیں۔
میڈیا میں گردش کرنے والا دعویٰ کہ 125 کمپنیاں پاکستان چھوڑ گئی ہیں، درحقیقت 1977 سے اب تک کے مجموعی اعداد پر مبنی ہے، حالیہ 3 سالوں کا نہیں۔
یہ بھی پڑھیے: پاکستان میں غیر ملکی کمپنیوں کی سرمایہ کاری میں دلچسپی بڑھ گئی
غیر ملکی سرمایہ کاری کے حوالے سے بھی مثبت رجحان دیکھا گیا ہے، کیونکہ گزشتہ ماہ 82 مقامی کمپنیوں میں مختلف ممالک سے سرمایہ کاری ریکارڈ کی گئی، جن میں چین، امریکا، برطانیہ، جرمنی، آسٹریلیا، ترکی، جنوبی کوریا، اسپین اور دیگر شامل ہیں۔
فروری 2026 تک کمیشن کے پاس 1,157 غیر ملکی کمپنیاں رجسٹرڈ ہیں، جو پاکستان میں بین الاقوامی کاروباری موجودگی اور سرمایہ کاری کے تسلسل کا عندیہ دیتی ہیں۔
حکام نے کہا ہے کہ یہ اعداد و شمار ظاہر کرتے ہیں کہ پاکستان میں غیر ملکی سرمایہ کاروں کا اعتماد برقرار ہے اور ملکی کاروباری ماحول میں دلچسپی مستحکم ہے۔
