وزیراعلیٰ پنجاب مریم نواز نے کہا ہے کہ انہوں نے پولیس اور انتظامیہ کو ہدایت کی ہے کہ مظاہرین کے احساسات کو سمجھا جائے اور ان کے ساتھ عزت و احترام کے ساتھ پیش آیا جائے۔
سماجی رابطے کی سائٹ ایکس پر اپنے ایک بیان میں انہوں نے کہاکہ مظاہرین کے لیے افطار کا بندوبست کیا جا رہا ہے۔
میں نے پولیس اور انتظامیہ کو ہدایت کی ہے کہ مظاہرین کے احساسات کو سمجھا جائے اور ان کے ساتھ عزت و احترام کے ساتھ پیش آیا جائے۔ مظاہرین کے لیے افطار کا بندوبست کیا جا رہا ہے۔ ہر مسلمان اس وقت دکھی اور اشکبار ہے مگر اپنے ملک، اپنے شہروں میں امن و امان قائم رکھنا بھی ہم سب کا اولین…
— Maryam Nawaz Sharif (@MaryamNSharif) March 1, 2026
مریم نواز کا کہنا تھا کہ ہر مسلمان اس وقت دکھی اور اشک بار ہے مگر اپنے ملک اور اپنے شہروں میں امن و امان قائم رکھنا بھی ہم سب کا اولین فرض ہے۔
انہوں نے عوام سے اپیل کی کہ اس فرض کی پاسداری کی جائے اور کہا کہ دکھ کی اس گھڑی میں ہم سب ایک ہیں۔
واضح رہے کہ امریکا اور اسرائیل کے ایران پر حملے میں ایرانی سپریم لیڈر آیت اللہ خامنہ ای شہید ہوگئے ہیں، جس کے خلاف پاکستان کے مختلف شہروں میں بھی احتجاج کیا جارہا ہے۔
ایران پر حالیہ حملے کے بعد پیدا ہونے والی صورتحال کو انتہائی حساس قرار دیتے ہوئے حکام کی جانب سے کہا گیا ہے کہ اس وقت جذباتی ردعمل کے بجائے دانشمندانہ طرزِ عمل کی ضرورت ہے۔
بیان میں کہا گیا کہ پاکستان نے سفارتی، اخلاقی اور سیاسی سطح پر ایران کی بھرپور حمایت کی ہے اور اقوام متحدہ میں بھی واضح طور پر حملے کی مذمت کی ہے۔
عالمی سطح پر مؤثر سفارت کاری جاری ہے، لہٰذا داخلی طور پر غیر ضروری شدت پسندی یا اشتعال انگیزی پاکستان کے مفاد میں نہیں۔
مزید کہا گیا کہ اگر احتجاج شدت اختیار کر جائے، سرکاری یا نجی املاک کو نقصان پہنچے یا قانون کو ہاتھ میں لیا جائے تو اس سے صرف دشمن عناصر کو فائدہ ہوگا۔
