ایران کے سپریم لیڈر آیت اللہ خامنہ ای کی شہادت کے بعد ملک بھر میں جاری احتجاج اور سیکیورٹی کی صورتحال کے باعث آج یعنی 2 مارچ بروز پیر پاکستان کے کن بڑے شہروں میں اہم شاہراہیں اور راستے بند رہیں گے؟
بات کی جائے کراچی کی تو گزشتہ روز ہونے والے احتجاج کے باعث امریکی قونصل خانے کو محفوظ رکھنے کے لیے اس سے منسلک سڑکوں سمیت سیکیورٹی اور دیگر وجوہات کے باعث مختلف اہم شاہراہیں بھی ٹریفک کے لیے بند کر دی گئی ہیں اور ٹریفک پولیس نے شہریوں کو متبادل راستے اختیار کرنے کی ہدایت کی ہے۔
یہ بھی پڑھیں: ملک بھر کے ایئرپورٹس سے مشرق وسطیٰ جانے والی سینکڑوں پروازیں منسوخ
کراچی ٹریفک پولیس کے مطابق ایم ٹی خان روڈ سے پی آئی ڈی سی روڈ اور مائی کلاچی روڈ ریلوے پھاٹک تک آمد و رفت معطل ہے، ٹریفک پولیس نے شہریوں کو ہدایت کی ہے کہ بلاول ہاؤس سے جناح برج جانے والے افراد مائی کلاچی روڈ کے بجائے متبادل راستے استعمال کریں۔
متبادل کے طور پر شہری بوٹ بیسن سے 3 تلوار، میٹروپول اور شاہین کمپلیکس کے راستے اپنی منزل کی طرف جا سکتے ہیں، جبکہ ماڑی پور روڈ سے بوٹ بیسن جانے والے افراد آئی آئی چندریگر روڈ کو متبادل راستے کے طور پر اختیار کریں۔
شہر کی اہم آرٹری شاہراہ فیصل کو بھی ایف ٹی سی کے مقام پر بند کیا گیا ہے ٹریفک پولیس کے مطابق گورا قبرستان سے ٹریفک کو صدر کی طرف موڑا جارہا ہے۔
مزید پڑھیں: خطے میں جنگی صورتحال، پاکستان اسٹاک ایکسچینج بدترین مندی سے دوچار
دوسری جانب ریڈ زون سے منسلک ڈاکٹر ضیا الدین روڈ کو کنٹینر لگاکر وزیر اعلی ہاؤس کے قریب سے بند کردیا گیا ہے، ٹریفک پولیس نے شہریوں سے اپیل کی ہے کہ غیر ضروری سفر سے گریز کریں اور دورانِ سفر ٹریفک پولیس کی ہدایات پر عمل کریں۔
کراچی کی طرح دارالحکومت اسلام آباد میں بھی گزشتہ روز کے احتجاج کے باعث ریڈ زون کو سیل کردیا گیا ہے، وفاقی دارالحکومت میں سیکیورٹی ہائی الرٹ پر ہے اور ڈی چوک سمیت حساس علاقوں کو محفوظ بنانے کے لیے اقدامات کیے گئے ہیں۔
ترجمان اسلام آباد پولیس کے مطابق ریڈزون میں داخلے کے لیے مارگلہ روڈ اور میریٹ ہوٹل کے راستے کھلے رہیں گے، ان راستوں کے علاوہ ریڈزون کی طرف جانے والے تمام داخلی راستے بند رہیں گے۔
کلب روڈ سے آنے والے شہری کشمیر چوک سے سری نگرہائی وے سے سیونتھ ایونیو، مارگلہ روڈ استعمال کریں۔ بھارہ کہو سے آنے والے شہری کشمیر چوک کے ذریعے سری نگر ہائی وے، سیونتھ ایونیو، مارگلہ روڈ استعمال کریں۔
مزید پڑھیں: آج اسلام آباد میں سفر کرنے والوں کو کون سا راستہ اختیار کرنا ہوگا؟
لاہور میں امریکی قونصل خانے کے اطراف پابندیاں عائد ہیں امریکی قونصل خانے کی طرف جانے والے راستوں پر رکاوٹیں لگا دیے گئے ہیں، مال روڈ اور کینال روڈ پر ٹریفک کی روانی متاثر ہے اور پولیس کی بھاری نفری تعینات ہے۔
بات کی جائے پشاور اور کوئٹہ کی تو ان دونوں شہروں میں اس وقت تک کوئی سڑک بند نہیں کی گئی ہے، کوئٹہ میں امریکی قونصل خانہ نہ ہونے کے باعث حالات معمول پر ہیں جبکہ پشاور میں گزشتہ روز ہونے والے پر امن احتجاج کے بعد آج حالات معمول پر ہیں۔
مزید پڑھیں:کوئٹہ ٹریفک پولیس کا عوام دوست ماڈل
حالات کے پیش نظر گلگت، اسکردو اور شگر میں 3 روز کے لیے کرفیو نافذ کر دیا گیا ہے، گلگت بلتستان کی عبوری حکومت کے ترجمان شبیر میر شینا کے مطابق گلگت، سکردو اور شگر میں 3 روز کے لیے فوج تعینات کردی گئی ہے جبکہ داخلی اور خارجی راستوں پر چیکنگ کی جا رہی ہے۔
